«بدأت أفكر من سنة ونص وكنت بساومها».. نص اعترافات المتهم بقتل نيرة طالبة جامعة المنصورة

حصلت «المصري اليوم» على نص التحقيقات في القضية التي حملت رقم 11409 لسنة 2022 جنح أول المنصورة، والمعروفة إعلاميًا بقتل نيرة أشرف، طالبة المنصورة.
جاء بتحقيقات النيابة العامة أن المتهم محمد عادل عقد العزم على قتلها، انتقامًا منها لرفضها الارتباط به، وإخفاق محاولاته المتعددة لإرغامها على ذلك، إذ وضع مخططًا لقتلها، وحدد موعد أدائها اختبارات نهاية العام الدراسي بجامعة المنصورة لتنفيذ الجريمة.
وقال المتهم في اعترافاته: «كان لازم أخلص عليها ومخليهاش على وشّ الدنيا، ونزلت يوم 20 يونيو الماضي، ومعايا السكينة وركبت الأتوبيس ولقيتها قاعدة ولمّا شوفتها قلت دي فرصة إنّ أنا أريح نفسي وأخلص منها، وهي نازلة من الباص، وأول ما نزلنا هي كانت سبقاني بخطوات، وأنا نزلت وكان كل اللي في دماغي إن أروح أخلص عليها ومشيت وراها وأول ما قربت منها ونزلت عليها وفيه ناس قربوا مني علشان يبعدوني عنها، فأنا قولتلهم محدش يقرب مني وخوفتهم عشان محدش يقدر يخلصها من إيدي لحد ما خلصت عليها خالص، وساعتها فيه واحد مسكني من ضهري وشالنى بعيد عنها وساعتها الناس مسكتني وسلموني».
عملت فيّا محضر
قال المتهم في اعترافاته: «أنا كنت ببعت من حسابي لأهلها وكل معارفها، وهي قالتلي إنها عملت فيا محضر، وأنا مكنش راضيني اللي هي عملته وكنت مصمم آخد حقي منها ومسكتش وكنت بساومها يا إما ترجعلي وكل حاجة تخلص يا إما هقرفها».
جلسة عرفية
وأضاف قائلًا: «أنا فضلت أعمل اللي بعمله لحد ما أهلها عرفوا يقعدوني في قعدة وكان كلامهم شديد معايا وكان ردهم بيستفزني، وأنا مضيت على عدم تعرض، وأنا كنت ساكت وخلاص ولكن كان في دماغي إني آخد حقي منها». تابع المتهم خلال اعترافاته التفصيلية عن الحوار الذي دار بينه ووالد المجني عليها: «أنا كلمته وقولتله بنتك بدأت تجيب سيرتي تاني ولقيته بيرد عليا وبيقولي إن هو مش بإيده حاجة، وإن أنا ليا حق عندكم وأنت لازم ترجعهولي».
كنت ساعات بهددها
استطرد المتهم في الاعترافات: «أنا كنت بحاول أتكلم معاها بأي طريقة وكنت ساعات بهددها إن أنا لسه معايا مكالمتك ليا، وساعات تانية كنت بتكلم معاها عادي بس هي كانت دايمًا ردها ناشف عليا، وأنا كنت بعمل حسابات كتيرة علشان أكلمها لحد مانا بدأت ابعتلها secret message من على الانستجرام، وأنا كنت بعمل أكونتات كتير ومش متذكرها كلها، وأنا معملتش حسابات باسم المجني عليها على نحو يخل بشرفها ولا حاجة من الكلام ده بس هي افتكرت إن أنا اللي عملت كده بسبب الخلافات اللي بيننا».
التخطيط للجريمة
كشف المتهم عن كيفية تفكيره في التخلص من المجني عليها قائلا: «أنا كان بيراودني موضوع إن أنا أخلص عليها من سنة ونص وكنت بصبر نفسي بأهلي وإخواتي وبقول بلاش أدمر مستقبلي، وأنا كنت بحاول أبعد نفسي عن فكرة قتلها بس أنا مكنتش بعرف أشيلها من دماغي وكان الموضوع محل تنفيذ عندي، وأنا كان في بالي إني أنا أجيب حد وأخليه يخلص عليها أو يعلم عليها مدى حياتها علشان تعرف أنا أقدر أعمل إيه، وأنا كنت برجع في كلامي كل مرة ويقول بلاش أدمر مستقبلي».
وأوضح: «هي مكنتش بتعمل حاجة ليا مباشرة ولكن كان الكلام بيوصلني من الناس وده اللي كان بيخليني أرجع أفكر إني أخلص منها، وأنا في نص شهر رمضان اللي فات لقيت ناس جاية بتقوللي ابعد عن البنت وملكش دعوة بيها وكفاية اللي حصل علشان ميكونش فيه مشاكل، وأنا ما استجبتش لكلامهم ولكن أنا سايرتهم لحد ما أتمكن منها في الامتحانات وأخلص عليها علشان أنا كنت متأكد إنها هتنزل الامتحانات وساعتها هعرف أخلص عليها وأعمل اللي نفسي فيه».
واعترف المتهم بقتل نيرة: «أنا فكرت إني أخلص عليها في ثالث يوم امتحان ليها وإني هنفذ قتلها بسكينة، علشان ده اللي يناسبني وأنا شغال طباخ وبعرف أستخدم السكاكين كويس، وأنا عارف إن السكينة الحامية هي اللي ممكن تدبح وإنها بتستخدم في ذلك وأنا بستخدمها كويس لأن ده شغلي، وأيوة أنا على علم بالمواضع القاتلة بجسدها، وهي الرقبة والصدر من ناحية القلب والفخذ والطعن بالسلاح، وأنا اشتريت السكينة بعد أول امتحان بأسبوع وكانت الامتحانات بتاريخ 26 /5 / 2022وأنا اشترتيها في 2022/6/1، وهو سكين وسلاحها مسنون ولسه جديد وحافظت عليه في جرابه علشان يكون سنه حاد ويساعدني في التنفيذ».
وشرح المتهم بقتل طالبة كلية الآداب بجامعة المنصورة، أن سبب اختياره ثالث امتحان لتنفيذ جريمته، لأن أنا كنت خايف إن يكون معاها حد من أصحابها أو أهليتها ولأن هي كانت عارفة اني مش هسكت فقلت لازم أطمنها لحد ما أتمكن من تنفيذ اللي أنا عايزه ولم أنفذه أيضا، لأن أنا متمكنتش منها في نفس اليوم ومشفتهاش ومجاش الوقت إني أقدر أنفذ فيه مخططي ولا في اليوم الرابع للامتحانات أيضا، ولأن أنا كنت مستني أشوفها وإحنا رايحين وأركب معاها ولكن أنا لم أتمكن من الركوب معاها ولما خلصت الامتحان مشفتهاش وروحت».
وأكد المتهم :«أنا كنت واخد قراري وهنفذه ومفيش حاجة هتغير تفكيرى ده، وفي يوم الواقعة أنا صحيت النهارده خدت السلاح في جرابه وحطيته في جنبي اليمين ونزلت اتمشيت لحد ما وصلت المحطة واستنيت الأتوبيس علشان أوصل المنصورة وأخلص عليها ولما طلعت لقيتها قاعدة فيه وطول الطريق كنت بفكر أقوم أخلص عليها في الاتوبيس بس كنت خايف إن الناس تحوش عنها ومقدرش أخلص عليها واستنيت لما تنزل وطلعت أجري وراها وقبل ما أخش عليها طلعت السلاح من جنبي ونزلت فيها طعن بالسلاح وفي ناس جت تحوش هوشتهم وروحت نازل عليها تاني وذبحتها من رقبتها وساعتها الناس مسكتني وسلموني للشرطة، وأنا كنت مستني الأتوبيس وكنت مستني اركب ومكنتش أعرف إنها راكبة في نفس الأتوبيس، ومدة المواصلات من المحلة للمنصورة لم يتغير تفكيري نحوها، وأنا كنت مصمم ومصدقت إنى أوصل المنصورة علشان أخلص عليها».
وشرح المتهم طريقة ارتكابه جريمته، بقوله: «أنا لحقتها من وراها وهي حاولت تلحق نفسها ووقعت وأنا نزلت طعن فيها بالسكينة، وأنا مصدقت إني شفتها وقعدت أسدد السكينة في جسمها ومعرفش سددت كام طعنة، وهى مقاومتش وملحقتش لأن أنا عارف أنا بضرب فين وعارف أنا هخلص عليها إزاي، وفي ناس جم يحوشوا عنها وأنا هوشتهم بالسلاح وقلتلهم محدش يقرب ونزلت بالسكينة وذبحتها وتيقنت من إنها فارقت الحياة لأنها مقمتش من مكانها ولا اتحركت أي حركة».
وقال المتهم عن رسائل التهديد التي أرسلها للمجني عليها احتوت تهديدات للمجني عليها وذلك على النحو التالي: «عايزك تستعدي بقى للي هيحصل- مرسلة بتاريخ 6 أبريل، ورسالة أخرى كتبت فيها.. دانا هدبحك. ورسالة أخرى مضمونها.. إنتي حسابك معاي تقيل أوي بلاش تزوديها عشان والله ما هسيب فيكي حتة سليمة»، مضيفًا: «فعلًا أنا كنت باعتلها الكلام ده وأنا كنت ناوي على قتلها وإزهاق روحها وكنت كل شوي بصبر نفسي بأي حاجة لغاية ما خلصت النهارده وخلصت عليها».