المصري كيدز: «حدوتة».. «الفلاح والحرامى»

كان فى مرة فلاح بسيط عنده حمار ومعزة وكل يوم ينزل بيهم الفلاح يلم المحصول على الحمار والمعزة تاكل عشان تجيب الحليب ليه، وكان عايش على الفلوس القليلة جدًّا اللى بتيجى من بيع المحصول والحليب كل يوم ولكن الفلاح الجميل كان راضى جدا ومبسوط وديما سعيد ويقول الحمدلله، وفى يوم زى كل يوم نزل الفلاح وجمع المحصول وحطه على الحمار وكانت المعزة أكلت وشبعت وهو راجع فى الطريق كان فى حرامى واقف بيراقب فيه من بعيد وكان معاه ابنه وقاله النهارده أعلمك درس كبير ازاى تقدر يبقى معاك فلوس كتير من غير مجهود كبير، بص الفلاح دا بيتعب إزاى وكل يوم ينزل يشتغل ويعمل مجهود احنا بقى بسهولة خلاص وبدون أى مجهود هناخد منه المحصول والحمار والمعزة كمان.
قاله ابنه ودى هنعملها إزاى؟ قاله لازم يكون معاك شنطة الأدوات وفتح الحرامى شنطة مليانة وشوش وماسكات كتير، وقاله أقف اتفرج عليا من بعيد؟ ولبس الحرامى أول وش وماسك معاه وكان الخداع وهو إن الفلاح ماشى ووراه الحمار والمعزة واقفة، الحرامى وهو لابس ماسك الخداع وظهر ليه وهو تعبان ومرهق ومش قادر يتكلم خالص وقاله الحقنى الحقنى يا فلاح. سأله الفلاح: مالك فيك إيه؟ بدأ الحرامى يعيط ويقوله كنت راجع زيك كده معايا المعزة بتاعتى وطلع عليا حرامى فى الطريق ضربنى وبهدلنى وأخد المعزة بتاعتى ومش بيسيب أى حد يعدى معاه معزة من الطريق.
قال الفلاح: طب أنا هعمل إيه؟ مفيش طريق تانى للسوق ولو رجعت المعزة البيت مش ألحق أبيع المحصول. عرض عليه الحرامى بالخداع إنه ياخد المعزة بتاعته يوصلها البيت والفلاح يروح يبيع المحصول وبكده الحرامى مش هياخد منه المعزة وافق الفلاح وهو مبسوط وقاله انت كدا هتعمل فيا معروف، وأخد الحرامى المعزة وكمّل الفلاح فى الطريق للسوق.
رجع الحرامى لابنه قاله ودلوقتى جه دور الحمار وفتح شنطة الأدوات وطلّع ماسك الكدب وظهر ليه الحرامى بشكل جديد ووش جديد، وقال للفلاح: انت رايح السوق؟ قاله آه. قاله: طب ممكن امشى معاك فى الطريق أصلى معرفش هو فين.
قاله الفلاح: طبعًا طبعًا تعالى معايا ومشى الفلاح والحرامى معاه، وحكى ليه الفلاح عن موضوع المعزة. ضحك الحرامى، وقاله: إنت إنسان طيب جدًّا، دا هو دا الحرامى وانا شوفته وهو ماشى ناحية الغابة ومعاه معيز كتير، روح الحق بيه. طلب الفلاح من الحرامى إنه يخلى باله من الحمار وجرى ناحية الغابة عشان يلحق المعزة بتاعته وساعتها أخد الحرامى الحمار ورجع لابنه وقاله أخدنا الحمار والمحصول والمعزة كمان.
رد ابنه: بس دا كدا حرام انت كدا سرقتهم منه! قاله: لا هو اللى اداهم ليا بمزاجه، أنا كدا مش حرامى. قاله ابنه: بس انت استخدمت الخداع والكدب عشان توصل للى انت عايزه واستغليت طيبة الفلاح. قاله: ودى منى شطارة وبكدا مابقاش حرامى.
رجع الفلاح الغلبان وهو مقهور من العياط ويقول شقا عمرى راح خلاص مش هعرف آكل ولا أشرب تانى ولا أجيب أكل لولادى وقعد يدعى ربنا كتير لحد ما قابل واحد من التجار فى السوق وحكى ليه عن الحرامى، رد وقاله: إنت فلاح طيب وغلبان ماتزعلش بس اتعلم من الدرس. قاله: أكيد اتعلمت وطلب التاجر من الفلاح إنه يساعده فى جمع المحصول بتاعه لإنه محتاج معاه فلاح وجاب ليه حمار وقاله عشان تحط عليه المحصول بتاعى وطلب منه الفلاح إنه يستخدم الحمار فى إنه يحط عليه المحصول بتاعه هو كمان.
رد عليه التاجر: إنت أمين وصادق يا فلاح، كنت ممكن تستغل الحمار بتاعى من غير ما اعرف لكن إنت أمين، ووافق التاجر وبقى الفلاح يروح السوق مرتين مرة بمحصول التاجر ومرة بمحصوله هو، وربنا كرمه كتييير جدا بالشغل مع التاجر وقدر إنه يجيب حمار ليه ومعزة واتنين والرزق معاه زاد، أما الحرامى فضل يتلاعب بالناس بالوشوش بتاعته ما بين كذب وخداع وخيانة لحد ما الناس كلها عرفت إنه بيلبس وشوش مبقاش حد بيصدقه خالص واتعرف إنه حرامى وبقى يمشى مذلول ومش قادر يبص فى وش حد خالص وقال لابنه: اوعى تعمل زيى وتلبس وشوش أنا كنت فاكر دا ذكاء منى لكن كنت غلطان.
بدأ الحرامى يروح لكل واحد خدعه ويعتذر له ويرجّع ليه حاجته بعد ما عرف إن الكدب والخداع دول بيسرقوا من الناس فرحتهم وتعبهم وكمان صحتهم.