وزير الرياضة يتدخل لحل أزمة البطل الأولمبي أحمد الجندي بمجمع استاد القاهرة

نجح الدكتور أشرف صبحي، وزير الشباب والرياضة، في حل الأزمة التي تعرض لها البطل الأولمبي أحمد الجندي، لاعب منتخب مصر للخماسي الحديث، اليوم الأربعاء 8-6-2022، خلال استعداده لخوض تدريباته اليومية.
وأكد الجندي أن وزير الشباب والرياضة تواصل معه هاتفيًا وأوضح أن المشكلة «غلطة» في التعليمات، موجها شكره إلى صبحي على سرعة التدخل واهتمامه بحل المشكلة.
وكتب الجندي عبر حسابه الرسمي بموقع التواصل الاجتماعي فيسبوك: «تعقيبًا على ما تم نشره صباح اليوم بخصوص parking الاستاد تواصل معي وزير الشباب والرياضة هاتفيًا وإدارة الاستاد وتوضيح المشكلة «بغلطة» في التعليمات.
وأضاف: «أود أن أشكر الدكتور/ أشرف صبحي على اهتمامه وسرعة حل الموضوع».
وأوضح: «زي ما قلت إن المشكلة ده لا أربطها تمامًا بموضوع (محمد الشوربجي) ولكنها مشكلة شخصية ومش حابب تتكرر معايا تاني ومكنتش حابب أضيع حقي برضه لإن الموضوع بالنسبالي مش اني أحمد الجندي اللي جايب ميدالية أوليمبية ولكن بصفتي لاعب في المنتخب ونيابة عنهم كان لازم أتكلم عن اللي حصل وحابب أشكر كل الناس اللي اهتمت بالموضوع وساعدوا في حله».
وكان البطل الأولمبي أحمد الجندي، لاعب منتخب مصر للخماسي الحديث، والمتوج بالميدالية الفضية لأولمبياد طوكيو 2020، قد أعرب عن استيائه من قرارات أحد مسئولي مجمع حمامات السباحة باستاد القاهرة الدولي، والذي عرضه لموقف محرج اليوم الأربعاء 8-6-2022، خلال استعداده لخوض تدريباته اليومية.
وكتب أحمد الجندي عبر حسابه الرسمي بموقع التواصل الاجتماعي فيسبوك، تفاصيل الأزمة التي تعرض لها بسبب قرار من أحد المسؤولين، والتي جاءت تفاصيلها كالتالي: «حصل موقف النهاردة عند مجمع حمامات السباحة باستاد القاهرة الساعة 6 الصبح وانا داخل التمرين الأمن قال لي إن في تعليمات بعدم دخول العربيات لparking المخصص لحمام السباحة ولا حتى الركنة في محيط الباب الخارجي للجراچ يعني لو عايز تركن يبقى تروح تركن بعيد عن الباب بحوالي 100 متر».
وأضاف: «يعني انت محتاجلك حوالي من 10 ل 15 دقيقة عشان توصل لحمام السباحة نفسه بسبب مسافة الparking الكبيرة أساسًا».
وتابع: «المهم بسأل الأمن ليه التعليمات ده قال لي أصل في (مسؤول) كان داخل حمام السباحة امبارح الثلاثاء (اتعطل 12 دقيقة)!!! فالدنيا اتقلبت و(المسؤول) قرر أنه يعاقب الكل أن مفيش عربيات تدخل الparking اللي بياخد حوالي 200 عربية بدون عمل أي اعتبار إن ده لاعب منتخب ولا أي حاجة ومش بس كدة لا، ده كمان محدش يركن في محيط الباب الخارجي أصلًا اللي هو انا بعاقبك انك هتدخل بشنط التمرين 15 دقيقة مشي الساعة 6 الصبح وتتأخر على تمرينك عشان (انا المسؤول) اركن مكان ال200 عربية».
وواصل: «يعني انا ابقى صاحي 5 الصبح وورايا يوم طويل عشان اروح مكان التمرين اللي هو أصلا المفروض تبقى كل حاجة متسهلة فيه مش بنقول بقى ده موقف في الشارع فطبيعي انه يحصل، ومع كامل احترامي الفكرة إن (المسؤول) ده المفروض انه عارف قد ايه أن اللاعب بيبقى الصبح صاحي مش شايف قدامه من قلة النوم أو المجهود فبدل متيسرله تمرينه لا احنا نعطله أكتر».
وأكمل: «أنا مش هربط الموضوع ده بموضوع (محمد الشوربجي) لاعب الاسكواش لإن المشكلة دي تعتبر نقطة في بحر وممكن أي حد تاني يشوفها مش مستاهلة ولا أي حاجة لكن لا أي حد بيلعب رياضة بشكل محترف هيفهم النقطة في أن كل واحد فينا مبيصدق يلاقي حاجة تريحه يعني انا لو عليا كنت ركنت عربيتي مكان الstart بتاع حمام السباحة».
واختتم: «السؤال اللي كنت عايز اسأله هنا.. حضرتك ناوي تفضل معاقبنا لحد امتى؟!».
جدير بالذكر أن أحمد الجندي، حصد الميدالية البرونزية في منافسات بطولة العالم للكبار وتأهل إلى أوليمبياد طوكيو والتي حصد فيها الميدالية الفضية، وفاز بلقب أفضل ناشئ في العالم، وحصل على جائزة محمد بن راشد آل مكتوم في الإبداع الرياضي، بالإضافة إلى العديد من الميداليات والبطولات التي حققها على مستوى بطولات العالم للشباب.