صناعة ال«بودكاست» في الواقع المحلي: المصريون يفضلون «الفيديوهات» و«حكاوى النميمة»

«البودكاست Podcast» تدوينة صوتية أو محتوى صوتى مسجل، تبدأ مدته من دقيقة واحدة، ويصل أحيانًا إلى ساعة أو أكثر، ويناقش موضوعًا واحدًا محددًا ومكثفًا، يمكن أن يكون صديقًا للمستمع فى طريقه إلى العمل، فى سفره، فى القيام بأى مهام يومية، ويختلف عن الراديو فى أنه محتوى مسجل، يمكنك سماعه فى أى وقت شئت، وعلى عدة برامج، وبدون فواصل إعلانية أو غنائية أو مداخلات أو إطالة فى الحديث.
البودكاست ليس بقديم مثل الراديو، ظهر منذ عام 2003، ولكنه بدأ يشتهر ويتسع حول العالم منذ سنوات قليلة فقط، واسمه مُنشق من كلمتين، أولًا كلمة Pod اختصار من جهاز شركة أبل «iPod»، والجزء الآخر cast اختصار من مصطلح الإذاعة نفسه «Broadcast».
فى الآونة الأخيرة، انتشر بشدة سواء من محترفين ومنصات معروفة أو هواة، فيوميًا نرى مئات التسجيلات منه، حتى إنه شارك فى إنتاجه مؤخرًا مشاهير، ورغم أنه اكتسب شهرة واسعة بالخارج، فإن مصر مازالت على الأعتاب الأولى من هذا العالم.
رشا الديب، من أشهر منتجى ومقدمى محتوى على البودكاست فى السنوات الأخيرة بالوطن العربى، تعرفنا على أهم النقاط التى تخص هذا العالم: «البودكاست بقى شىء مهم وضرورى فى عالمنا، وهو بيفرق كتير عن الراديو، الأداء الإذاعى بيكون ارتجالى، وفيه إطالة، وأحيانًا كلام خارج السياق، ولكن البودكاست بيكون مكثف، وبيكون فى أداء معين موجه، وبيناقش موضوع محدد، زى التحرش مثلًا، وبيناقش جانب منه أو جميع الجوانب، فى عدد محدد من الدقائق.. وميزته أنه متاح طول الوقت، والناس بتختار عاوزة تسمع إيه، ومن مين».
اختلف الوضع كثيرًا فى عالم البودكاست منذ ظهوره حتى وقتنا الحالى، حيث توضح «رشا»: «أول ما بدأ الناس كانت بترغى كتير، وده كان بيوقع منهم جمهور كبير أوى.. ودلوقتى بدأوا يفهموا يعنى إيه يعملوا محتوى مكثف».
وأضافت: «دلوقتى بقى فى كمان برامج تسجيل صوتى كويسة، وتقدرى تسجلى من خلالها وتحطى موسيقى خلفية، بقى فى استثمار فى الصناعة خلاها تنتعش كويس جدًا. الصناعة قفزت 40% فى السوق مؤخرًا عما قبل». أما بالنسبة لعدد الدقائق: «فى تصنيفات يعنى مثلًا بتبدأ من دقيقة ل15 دقيقة، وده المثالى، لكن أحيانًا ممكن تصل ل40 دقيقة وأكثر، وده بيكون لطبيعة الموضوع، وله جمهوره برضو». وعلى الرغم من اتجاه عدد كبير من الشباب إلى البودكاست فى مصر، فإنه مازال لا يحظى بشعبية وشهرة كبيرة فى شارعنا، حيث تؤكد «رشا»: «المستمع المصرى مش أفضل مستمع للبودكاست.. بيفضلوا أكتر مشاهدة فيديوهات، بيحبوا يتفرجوا على صورة أكتر وسماع ومشاهدة حكاوى متعلقة بنميمة أكتر، ودى حاجة بعيدة عن محتوى البودكاست».
وعن أهمية وجود «البودكاست» قالت «رشا»: «إنه وسط آمن جدًا، مثلًا عملت بودكاست عن محاولة التحرش الأولى، واستضفت بعض الفتيات اللى حكوا عن تجاربهن بدون معرفة هويتهن، وبشكل آمن، فهو منصة آمنة تحديدًا لو حاجة متعلقة بالحراك أو العنف».