صابرين تبكي بعد خلع الحجاب: محدش هيحاسبني إلا اللي خلقني.. وربنا رحمن رحيم (فيديو)

دخلت الفنانة صابرين، في نوبة بكاء، في أول تعليق لها عقب إعلانها خلع الحجاب.
وقالت صابربن، في مداخلة هاتفية مع عمرو أديب ببرنامج «الحكاية»، على شاشة «أم بي سي مصر»، إنها لم تكن مرتدية الحجاب بل كانت محتشمة، مضيفة أنها كانت تؤكد على ذلك طوال الوقت، وأوضحت أنها خلعت «التربونة» وليس الحجاب.
وتابعت باكية: «ربنا يكرمني وأبقى على قد مستوى الحجاب وأنا من غيره وعمومًا أنا قلعت التربونة مش الحجاب، وفيه فرق بينهم، وتعبت نفسيًا بسبب كلام الناس، ولما بعمل عمل يسيبوا العمل والدور، ويتكلموا عن الباروكة بتاعتي، أنا كنت مقسومة نصين، وفي حالة تناقض، وكنت بتشتم من الناس بالرغم إني طول عمري بعمل أدوار محترمة، وربيت أولادي تربية محترمة».
وتابعت: «إيه ذنب ولادي انهم يتشتموا من الناس على السوشيال ميديا، وكان فيه حرب عليا، ومحدش هيحاسبني إلا اللي خلقني، والله ما لونت شعري، وهو هو لما كنت عاملة التربونة»، وأكملت: «طوال الفترة اللي فاتت كنت تعبانة نفسيًا جدًا، وبعمل الأدوار وأنا مربوطة، سيبوني أتصالح مع نفسي، وخلعت التربونة عشان نفسي مش عشان الشغل».
وختمت: «لازم أقول للناس الدين أخلاق ومعاملة وكلمة حق حلوة وابتسامة في وجه أخيك، بيشتموني دي حاجة بيني وبين ربنا ولما أنزل القبر لوحدي محدش هيحاسبني غير اللي خلقني وربنا اللي هيحاسبني وليه محسسني إن ربنا هيمسكنا عشان حتة طرحة ده ربنا رحمن رحيم».