كامل الوزير للنواب: «ليا نظام في شغلي ومش بضحك على حد»

قال المهندس كامل الوزير، وزير النقل والمواصلات، إنه حريص على تعظيم الموارد في وزارته بكل قطاعاتها للحفاظ على المال العام ومنع إهداره وضبط الأداء، وسرعة تنفيذ المشروعات وتحقيق الصالح العام.
جاء ذلك خلال اجتماع لجنة الإدارة المحلية بمجلس النواب، مساء الأحد، بحضور وزير النقل.
وحرص «الوزير» على الاعتذار لعدم حضور اجتماع اللجنة الاسبوع الماضي وقال إنه حدث «لبس» اثناء عرض خطتب الدعوة عليه وبمجرد علمه إن الجلسة منعقدة بادر واتصل برئيس اللجنة، وقال:«مقدرش اتأخر، أنا بمجرد ما أعرف إن حد عايز يقابلنى يشوف شغلنا، بحب أروح للناس علشان يطمنوا على بلدهم وعلى الشغل وعلى جيشهم وقت ما كنت في القوات المسلحة».
وأضاف الوزير أن النواب يتواصلون معه يوميا «ومش هسييبكم وهنطلع مع بعض كل يوم وننزل مع بعض الفجر ونشوف طرق وكبارى وغيرها».
وبخصوص ميناء البحر الأحمر قال الوزير إنه لو أثبت النواب وجود قصور، عليهم اختيار أفضل من يتولى رئاسة هيئ ميناء البحر الأحمر وقال: «انتوا اللى حاسين بالناس وانتوا اللى هتنقلولنا مطالبهم ومشاكلهم».
وتابع وزير النقل: «أنا حتى الآن مخدتش مليم من الدولة، والحمد لله بدأنا نعظم مواردنا، ونحاول نمنع التزويغ والهروب من التذاكر، وفى أسبوع جايبين إيراد أعلى من الأسبوع اللى قبله، فالإيرادات كانت حوالى 41،7 مليون الأسبوع اللى فات، بزيادة عن الأسبوع اللى قبله 8،4 مليون، واللى في إيدنيا من موارد نعظمه ونستخدمه أحسن استخدام، فالسكة الحديد والموانى والنقل النهرى والكبارى جميعها تعاني مشكلات وعدم انضباط، ومن ستمتد ايده على المال العام مش هسيبه، وبعد اعتماد الموازنة سيتم البدء في تعظيم المشروعات التي اعتمادها، ومؤشرات الموازنة بتقول إنه احتمال يعتمد في وزارة النقل 35 مليار جنيه، وهو مبلغ قال الوزير إنه لا يكفي ليعلن أنه حقق المشروعات التي يسعى اليها خلال عام هناك 10 محاور على النيل، كلهم شغالين فيهم في وقت واحد وليهم خطة، نخلص العشرة دول الأول ويدخلوا الخدمة والناس تستفيد بيهم».
وتابع الوزير: «فى وقت قريب هقولكم تعالوا الخطة بتاعتنا أهى، دا نظام شغلى مش بحب أضحك على حد، اللى هقدر اعمله هعمله، عايزين نتكلم عن طريق يخدم الناس، محدش يجى يقولى عايز اعمل 100 متر أدام بيتى، بنتكلم عن طرق داخلية وطرق رئيسية بين المحافظات، ونستهدف إننا نسهل على المواطن».
وعن الوضع في السكة الحديد، قال وزير النقل: «السكة الحديد فيها شغل كتير جدا، الخردة مثلا كانت تباع في أحسن سنة ب12 مليون جنيه، خردة قضبان عربيات نقل وغيرها، وناس تعمل حركات مش مضبوطة، 12 مليون في الكهن الثمينة، إحنا قولنا الكلام دا مينفعش، وفى جلسة واحدة بيعت ب340 مليون جنيه، وعايز أقولكم اطمنوا وادونا فرصة وهتشوفوا نتيجة مجهود كبير وتوفير كبير في الفلوس وتعظيم في الموارد المتاحة، هنعمل اللى يرضى ربنا ويرضيكم ويرضى شعبنا العظيم، وأنا من قرية في مركز المنصورة بمحافظة الدقهلية».