المواطن والجنيه

مواطن مصرى قال للجنيه استرنى وخليك فى جيبى أسبوع.. أهننك وأبغددك وأهشكك وأعملك كل ساعة سبوع.. وأغطى عليك برمشى وحياتك ما تمشى وتسيبنى موجوع.. دانا ليلى نهارى شغال ومفيش يوم بطّال وليه عنى ممنوع.. أبوسك ياسى الجنيه يا سعادة البيه خليك فى جيبى أسبوع.. هبّ الجنيه ودبّ وقال بصوت عالى قوى ومسموع.. اتنيل يا مصرى دانا لو جتلك هكون زى اللى من شجرة منزوع.. لا بريزة تخاوينى ولا شلن ولا حتى ربع جنيه مقطوع.. أنا مش ناقص غم وهم وفقر ومش ناقص نواح ودموع.. سيبنى يا عم أشوف حالى وخليك إنت فى الفقر منقوع.. أنا رايح للفسدنجى الحلنجى الوطنجى اللى بيعمل من الجنيه مجموع.. أروح معاه مارينا أو أهرب فى سفينة والكل فيه مخدوع.. ويا ريت تعذرنى ومتزعلش منى أنا عمرى ما أسّدلك جوع.. عشان أنا.. ولوحدى أنا.. بين العملات جربوع.