«المواطن والجنيه»

مواطن مصرى قال للجنيه أسترنى وخليك فى جيبى أسبوع.. أهننك وابغددك واهشكك واعملك كل ساعة سبوع.. وأغطى عليك برمشى وحياتك ما تمشى وتسبنى موجوع.. دانا ليلى نهارى شغال ومفيش يوم بطال وليه عنى ممنوع.. أبوسك يا سى الجنيه يا سعادة البيه خليك فى جيبى أسبوع.. هب الجنيه ودب وقال بصوت عالى قوى ومسموع.. إتنيل يا مصرى ده أنا لوجتلك هاكون زى اللى من شجرة منزوع لا بريزة تخاوينى ولا شلن ولا حتى ربع جنيه مقطوع.. أنا مش ناقص غم وهم وفقر ومش ناقص نواح ودموع.. سيبنى يا عم أشوف حالى وخليك أنت فى الفقر منقوع.. أنا رايح للفسدنجى الحلنجى الوطنجى اللى بيعمل من الجنيه مجموع.. أروح معاه مارينا أو أهرب فى سفينة والكل فيه مخدوع.. ويارب تعذرنى ومتزعلش منى أنا عمرى ما أسدلك جوع.. عشان أنا.. ولوحدى أنا.. بين العملات جربوع..