مرتضى منصور: غيري مش عارف يجدد للاعب عنده وعاملينه أسطورة (فيديو)

أبدى المستشار مرتضى منصور، رئيس نادي الزمالك، حزنه على قيام لجنة ممثلة من نيابة الأموال العامة، بالقدوم إلى نادي الزمالك، أمس السبت، للتحقيق مع هاني زادة وفحص كشوفات خزينة النادي الأبيض.
وقال «منصور»، في تصريحات لبرنامج «ملعب الشريف»، مساء أمس السبت: «لا يجرؤ خالد عبدالعزيز، وزير الشباب والرياضة، أن يقوم بما فعله مع الزمالك في أي نادي، فعندما صُدر الحكم بحل مجلس إدارة النادي الأهلي، ضرب خالد عبدالعزيز الحكم، وقال: مفيش حاجة عندي إسمها أحكام».
وتابع: «حزين لما يحدث في الزمالك».
وكشف «منصور» عن شعوره بارتكابه لعدة أخطاء منذ توليه رئاسة النادي الأبيض، حيث قال: «أنا غلطان لإنني سددت المديونية التي كانت على النادي، منها جزء للضرائب وجزء للتأمينات وجزء لمستحقات لاعبي الزمالك القدامى المتأخرة».
وتابع: «وغلطان عشان دفعت للمقاولون العرب 9 مليون جنيه، كانوا مديونية على المبنى الاجتماعي للزمالك، وغلطان عشان دفعت 12 مليون جنيه كانت على أرض فرع 6 أكتوبر، حتى لا تضيع على الزمالك، وباخد المكافأة فورية من الدولة».
وأردف: «غلطان عشان بسدد للأوقاف، وغلطان عشان دفعت حق تخصيص النادي النهري لوزارة الري، وغلطان عشان دفعت معسكر مرسى مطروح، وغلطان عشان وفرت 200 مليون جنيه للزمالك، وغلطان عشان اشتريت أحسن لاعبي مصر، وعشان أخدت 4 كأس ولقب دوري وسوبر، وغلطان عشان رجعت فريق اليد إلى كان نازل دوري درجة تانية».
واستطرد: «أنا غلطان في كل ده لإن الحرامي إلى سرق النادي محدش جه نحيته، من قالت عنه الرقابة الإدارية أنه أهدر 984 مليون، محدش كلمه».
وقال «منصور»: «أنا غلطان عشان ساهمت في قانون الرياضة، إتنسف قانون الرياضة النهاردة، وغلطان عشان جددت للشناوي وطارق حامد في أقل من 24 ساعة».
واختتم «منصور» تصريحاته في هذا الشأن، قائلًا: «غيري مش عارف يجدد للاعب عنده بقاله شهرين، وعاملينه أسطورة ومحدش يقدر يجي ناحيته، عشان معاه إعلام وأعضاءه واقفين جنبه».