النص الكامل لحوار «الاشتباك العنيف» بين «شوبير» و«الطيب» مع الإبراشي

وقعت مشاجرة عنيفة بين الإعلامي أحمد شوبير، والمعلق الرياضي أحمد الطيب، في برنامج الإعلامي وائل الإبراشي «العاشرة مساء» على قناة «دريم»، صباح الأحد، بسبب الخلاف الأخير الذي وقع بينهما.
خلال 16 دقيقة مدة استضافة شوبير والطيب، لم يخلو الحوار من تبادل الشتائم بين الطرفين، وسعي الإبراشي لاستكمال الحديث والتهدئة، حتى انتهى الحديث باشتباك عنيف بالأيدي، ورش المياه بين الطرفين.
وجاء الحوار كاملًا بين أطراف الحلقة على النحو الآتي:
وائل الإبراشي: قبل الفاصل كان معايا الكابتن أحمد الطيب، والذي يعد من أشهر المعلقين الرياضيين، وانضم إلينا الكابتن أحمد شوبير، الذي يعد واحد من أشهر رواد الإعلام الرياضي في مصر.
الإبراشي لشوبير: هل تتصيد لأحمد الطيب أم هناك أدلة حقيقية لديك بأنه يغذي التعصب الرياضي؟
شوبير: بسم الله الرحمن الرحيم، أنا مبحبش المواجهات، خاصة عندما تكون غير متكافئة، وأنا اعتذرت لحضرتك عن الظهور قبل الهواء يا أستاذ وائل، لأني كان عندي برنامج على «صدى البلد»، ولكن حطيت حاجة مسجلة، لكي استطيع الحضور لبرنامجك بسبب «موجة الكذب» التي أطلقها الطيب ضدي على الهواء معك.
شوبير مستكملًا: في البداية عايز أذكر كيف بدأت علاقتي بأحمد الطيب، فكان الطيب معلقًا متميزًا في القناة الرابعة، وأخذت منه أحدى لزماته، اللي هي (لا أحلى ولا أجمل)، وأنا الوحيد اللي في الوسط الرياضي اللي مبيكدبش، واعترفت أني أخدت (اللازمة دي) لأن مؤدب ولدي أخلاق، وبعد كده أحمد الطيب تقدم لاختبارات الإذاعة، وسقط، وكلمني لكي أتوسط له.
الطيب مقاطعًا لشوبير: كذاب، واللي بتقوله ده كدب، وصباعك ده ينزل تحت.
فردّ الإبراشي: يا كابتن أحمد أنا سبتك ساعة تتكلم، وهو من حقه يعلق على ما قلته، ولازم نحترم المشاهد
شوبير للإبراشي: أنا جيت البرنامج لأني بحترمك، ولو قلت كلمة (كذب) ربنا يحاسبني عليها، وأنا هقولك كلامك بشهود كلمت السيدة الفاضلة نجوى أبو النجا، وقولتها الولد ده موهوب، ومعلش أعمليله اختبار تاني، وحرام يسقط، وأعمليله لجنة ثانية، وهينجح، وبالفعل نجح وأصبح معلق في الإذاعة، بعد كده كلمة الأستاذ حسام الدين فرحات، اللي كان ماسك (النيل) وقولتله في ولد اسمه أحمد الطيب، ياريت يبقى معلق في القناة.
الطيب منفعلًا: الولد اللي بتقول عليه ده كان لاعب في منتخب السويس، ومدرب، وعمري ما هقول عليه كلمة (ولد ده)، ووربنا اللي بتقوله ده كذب.
شوبير للإبراشي: أستاذ وائل خليني أكمل الحوار وأرد على النقاط المحددة عشان أنا مسافر الأردن، عندي محاضرات في كلية إعلام هناك الصبح.
الطيب ضاحكًا: ربنا يستر على الأردن
شوبير للطيب: ربنا يستر على اللي زيك، وخليني ماسك نفسي يا أخي، وأنا ماسك نفسي بالعافية
الإبراشي للطيب: خلينا نسمعه أنتما مؤثران ولكما جمهور.
شوبير مستكملًا حديثه: كلمني علي سعيد الكعبي، رئيس قناة (أبو ظبي الرياضية)، وقالي عايزين معلقين شباب، ورشحتله أحمد الطيب وعلي محمد علي.
الطيب لشوبير: عليه الطلاق اللي بتقوله كدب
شوبير للطيب: لو كنت كداب مكنش كل إجازة تجبلي بدلة اعترافًا بجميلي عليك، وكان دائمًا بيقولي جميلك عليه كبير.
الطيب: موضوع البدلة ده صح، ولكن موضوع الجميل ده كدب.
شوبير للإبراشي: بعدها علي سعيد الكعبي، اتصل بيه يقولي منك لله (الطيب) بيحاربني عشان يمشيني من قناة (أبو ظبي) وبالفعل مشي علي سعيد، وبعدها الطيب انتقل لقطر، وانتقل للتعليق على مباريات الدوري العام على قناة «تن»، وفي أحدى مباريات الإسماعيلي، كان يستخدم لوصف ما حد من نتيجة ب(انقلاب)، وكان دائمًا يذكر كلمة (قطر) في تعليقه على كل المباريات، فقناة «تن» قالت ميجيش تاني، ومشيته، وبعدها جيه قناة «النيل الرياضية».
الطيب مقاطعًا: أنا عرفت اللي أتكتب عليه ده من اللي وراه دلوقتي، أقسم بالله عمري ما شفت (فُجر) زي ده، وعلى فكرة يا أستاذ وائل أنا قاعد عشان بحترمك، وأقسم بالله الرجل ده مش محترم، وسقط القناع
فرد عليه شوبير قائلًا: لو عايز تمشي قوم، وصدق بالله أنك مش محترم.
شوبير: أحمد الطيب جيه قناة «النيل» وعلق وروحت للمسؤولين اشتكيت لهم قولتلهم في مخطط بيتعمل وفتنة بتتزرع، فكل كلام (الطيب) في تعليق المباريات تعصب، وهو لا زملكاوي أو إسماعلاوي ولكن هو بيكره الأهلي فقط.
الطيب منفعلًا: أنت أكتر واحد مكروه من جماهير الأهلي دلوقتي، وأقسم بالله اللي بتقوله كذب في كذب.
شوبير للإبراشي: الراجل ده جايب معه مخطط من قطر، كل كلامه إيحاءات ورمي لتأجيج الفتنة، وأنا أشجع من أي حد فأنا الأول من تكلم عن فساد المحليات، وأزمة الجزائر وواجهت الألتراس، وأطالب بمحاكمة الطيب لأنه عميل لقطر، وقولت لأسامة الشيخ ومحمد كامل حرام عليك تحطه في تعليق المباريات على «النيل للرياضة»، وعلى فكرة جماهير الزمالك بتحبني لأني محايد ووشي حلو عليهم.
الطيب مستهزئًا: أه وشك حلو أوي، وهو مضايق أن الزمالك بقى بيفرح.
شوبير للإبراشي: هو معاه أجندة عميلة لقطر، وأسئل زملاءه أمير قطر عمله عقد بمرتب قد أية عشان يشوه مصر، وينشر التعصب.
الطيب ضاحكًا: أمير قطر عملي عقد، ههههههه، أه يا ملك التوازنات
شوبير للإبراشي: كل اللي فات ده كوم، وأنه يتكلم على زوجتي ده شيء تاني، وده اللي خلاني أجي البرنامج معاك، زوجتي خريجة جامعية، والدها من كبار رجال الأعمال، وبنتي مخرجة وتعمل معي وتحصل على مرتب كبير، وبنتي سلمى خريجة إعلام، ومتزوجة من رجل أعمال كبير، وما شاء الله أنا وأسرتي نصرف على قطر ومن قطر، أنا ولادي عمرهم ما يخرجوا بره مصر، وأنا مواقفي معروفة وطلعت في مظاهرات ضد الإخوان وعصام العريان لإسقاط مرسي، ولما روحت قطر مع بعثة منتخب مصر، كنت أكبر واحد عرض عليه أموال من رئيس قناة (الجزيرة الرياضية) لاستضافتي، وقولت له أنا سمكة والمياه بتاعتي مصر.
الطيب مقاطعًا: اللي بتقوله ده كدب أقسم بالله كدب.
شوبير منفعلًا بصوت عالي: أسكت أقسم بالله هرمي الكوباية في وشك، يا قليل الأدب، وأقسم بجلال الله با أستاذ وائل أنا جيت عشان بحترمك، ولكن يجيب سيرة زوجتي، وأبنائي، لااااا
الطيب: أية الصوت العالي ده بلاش جنان، أقعد مكانك.
شوبير يلقي المياه على وجه الطيب، ويذهب لضربه، مما جعل الطيب يرد عليه برش المياه، ويتبادلا اللكمات، ويخرج وائل الإبراشي لفاصل إعلاني.