منتهى الخطورة ..... لازم كله يقراه

انا اسمى سامى ابراهيم حسنين ضابط سابق فى جهاز ادارة الشؤون الداخلية وده جهاز سرى علشان كده مفيش ناس كتير تعرف عنه
الجهاز ده كان بيديره ( خالد داود على سيد) بتكليف من مبارك وجمال لعلاقته بيهم وبسبب الضغوط الاسرائيلية عليهم
طبعا كله هيلومنى ويتهمنى انى من بقايا النظام لكن اكيد كلكم هنقدروا موقفى لما تعرفوا انى اتهددت بالقتل انا واسرتى لما فكرت استقيل والخوف من انى افضحهم
بس دلوقتى مبقاش ينفع اسكت علشان الثورة متضيعش والشباب ميضحكش عليهم ولازم احاول اصلح اللى عملته قبل كده
اكيد كلكم هتستغربوا لما اقولكم ان الجهاز ده كان فيه اتفاقية تعاون بينه وبين الموساد ولو تفتكروا ان فى الوقت اللى مسكنا فيه الجاسوس وقعنا اتفاقية غاز جديدة مع اسرائيل وده يقولكم حجم التدخل الاسرائيلى فى البلاد
المصيبة الاكبر واللى عاوز احذركم منها دلوقتى ومينفعش نسكت عليها ان الجهاز ده مكنتش مهمته فقط ادارة شؤون البلاد زى مبيقولوا
يا شباب مصر فوقوا الجهاز ده هوه اللى صنع النظام من الالف للياء بالمؤيدين والمعارضين والاعلاميين
تخيلوا ان المعارضة الموجودة هى وهمية وصورية فقط وجزء من خطة اكبر تم وضعها لتهدئة الرأى العام واظهار ان فيه ثورة اتعملت ونجحت قدام الناس من علشان يخففوا الاحتقان اللى كانت الناس وصلت ليه
وطبعا مش هتتفاجئوا لما تعرفوا ان ابراهيم هاشم اللى مسؤوول عن (جهاز امن الثورة) دلوقتى واللى بيطالب بمحاكمة الفساد كان من احد مديرين الجهاز السرى
لو مش مصدقنى دى ارقام ارصدته فى البنوك الاوروبية والحسابات السرية (..............) فى بنك داربين البلجيكى فيه 456 مليون دولار وحساب رقم (...................) فى بنك دوتشكان النرويجى فيه 500 مليون يورو وحساب رقم (................) فى بنك هالز الالمانى فيه مليار و 200 مليون دولار وطبعا دى كلها حسابات سرية محدش هيعرف يوصلها
حد يقدر يقول الفلوس دى كلها جابها منين ؟!!!!!!!!!!!! حد يعرف ان يمتلك 3 شركات فى تل ابيب باسمه صديقه الشخصى جورج سيمون وده من اشهر عملاء الموساد
هوه المسؤول عن قتل كل من محمود احمد ورضا هانى واسماعيل مطر بايعاظ من جمال ولى نعمته علشان خلافات بين جمال وبينهم على صداقة فنانات مش لازم نقول اسماؤهم علشان دى اعراض
تعرفوا ان هوه اللى حرض الدول الافريقية على اتفاقية حوض النيل الجديدة بسبب الضغوط الاسرائيلية
هوه سبب المشكلة بين حماس وفتح من اجل شغل الراى العام العربى بالمصالحة وعلشان ننشغل بيها وننسى العدو الازلى الصهيونى
يا جماعة لازم نفوق ولازم يتحاكم ويتحاسب ويتقتل بالضرب بالجزم على اللى عمله فى البلد
ليه لحد دلوقتى محدش حقق معاه او حاسبه او حاكمه
احنا بيضحك علينا وانا بحاول اعمل حاجة صح اصلح بيها اخطائى
....
ده ملخص لرسالة او نوت او فيديو او مقال ممكن تقراه كل يوم كل ساعة مع اختلاف الاسماء وارقام الارصدة السرية اللى هى المفروض سرية والاتهامات لاى شخص
كل ما عليك هوه ان تكمل ما بين القوسين باسم اى حد انت متضايق منه واى واعمل شير وهتلاقى الناس كلها بكرة بتطالب محاكمته واعدامه مع انه ممكن يبقى شخصية خيالية
ملحوظة : الاسماء الموجودة كلها خيالية ومن تاليفى مع الاعتذار لاى شخص يتشابه اسمه مع الاسماء المذكورة
المشكلة بجد دلوقتى كبيرة وكل واحد ممكن يكتب نوتة او يعمل فيديو يتهم بيه شخص معين باى اتهامات الله اعلم بمدى صحتها وفى الوقت ده الناس مستنية اى اتهامات ضد اى حد علشان يصدقوها لاننا فى مرحلة شك
انا عن نفسى كل اللى هعمله لا هقرا نوتة ولا اشوف فيديو من النوع ده اللى عاوز يقول حاجة يطلع باثباتات تدين اى شخص لكن اى كلام هيتقال من غير اثبات ليس له مكان عندى غير الزبالة
وياريت الناس بردو متصدقش اى كبلم يتقال ضد اى حد حتى لو مبتحبوش