وفاة طفل «أسبوعين» بعد بتر ذراعه نتيجة «الإهمال» بكفرالشيخ.. ووالدته: مش هسيب حقه

توفي الطفل ياسين أحمد مروان، الذي يبلغ من العمر أسبوعين، الثلاثاء، والذي أجريت له عملية بتر في ذراعه، نتيجة «الإهمال الطبي داخل إحدى الحضّانات الخاصة بمدينة كفرالشيخ».
وقالت الدكتورة آلاء هشام، والدة الطفل المتوفى، على صفحتها عبر موقع التواصل الاجتماعي «فيس بوك»، الثلاثاء، «اتعملت أول عملية لبتر ذراع ابني اللى لسه يا دوب مكملش أسبوعين، والحمد لله ده قضاء ربنا وقدره، وإحنا راضيين به، ومسلمين لمشيئته، اللى أكيد فيها الخير والرحمة، لكن ده ما يمنعش أبدًا إني أدور على حق ابني، وحق أطفال كتير ممكن يكونوا ضحية الإهمال الطبي».
وأضافات: «ابنى أصيب بجلطة في ذراعه، بسبب تركيب كانيولا في الشريان بدل الوريد، أثناء وجوده في حضانة بكفر الشيخ، المصيبة الأكبر إن الدكتور اللي بايت معاه في الحضّانة معرفش إن دي إسكيميا، ولا عرف يتعامل معاها إزاى، وده ببساطة لأنه ممارس عام غير مؤهل إنه يكون الطبيب الوحيد المسؤول عن أطفال حديثي الولادة معظمهم حالات حرجة، الناس دى ضيعت على ابنى أول 6ساعات اللي كانت ممكن تنقذ ذراعه».
واختتمت حديثها قائلة: «أنا مش هسيب حق ابنى أبدًا، رغم التهديدات اللي بتيجى لزوجى، وواثقة إن ربنا هينصرنا، وحسبى الله ونعم الوكيل».