والدة رضيع فقد ذراعه بسبب الإهمال الطبى بكفرالشيخ: "مش هتنازل عن حق ابنى"

أكدت آلاء هشام والدة الطفل الرضيع الذى بترت يديه بسبب الإهمال الطبى فى كفر الشيخ، أنها لم ولن تتنازل عن حق ابنها بالرغم التهديدات المستمرة الذى تتلقاها هى وزوجها.
وقالت والدة الطفل، عبر صفحتها الشخصية على موقع التواصل الاجتماعى "فيسبوك": "اتعملت أول عملية لبتر ذراع ابنى اللى لسه يدوب ما كملش أسبوعين.. الحمد لله ده قضاء ربنا وقدره، وإحنا راضيين بيه ومسلمين لمشيئته اللى أكيد فيها الخير والرحمة، لكن ده ما يمنعش أبدًا إنى أدور على حق ابنى وحق أطفال كتير ممكن يكونوا ضحية الإهمال الطبى".
ووصفت والدة الطفل ما حصل لرضيعها، قائلة: "ابنى أصيب بجلطة فى ذراعه بسبب تركيب كانيولا فى الشريان بدل الوريد أثناء وجوده فى حضّانة الدلتا بكفر الشيخ.. المصيبة الأكبر أن الدكتور اللى بايت معاه معرفش إن دى إسكيميا ولا عرف يتعامل معاها إزاى.. وده ببساطة لأنه ممارس عام غير مؤهل إنه يكون الطبيب الوحيد المسئول عن أطفال حديثى الولادة معظمهم حالات حرجة".
وتابعت آلاء: "الناس دى ضيعت على ابنى أول 6 ساعات اللى كانت ممكن تنقذ ذراعه.. أنا وجوزى زى مصريين كتير قوى خدنا ابننا ع حضّانة بندفع مبلغ وقدره فى اليوم الواحد لكننا مكناش نعرف أبدًا إنها تجارة قذرة وإن الدكتور الجشع صاحب الحضّانة يسترخص ويجيب دكاترة تكليف يباتوا مع الحالات بدل ما يجيب مختصين.. دكاترة لا تقدر تتعامل مع أى مضاعفات تطرأ على الأطفال ولا حتى تميزها وتستدعى حد يقدر يتعامل معاها ولا حتى يبلغونا عشان نحاول ننقذ ابننا".
وشددت والدة الطفل، قائلة: "أنا مش هسيب حق ابنى أبدًا برغم التهديدات اللى بتيجى لزوجى.. واثقة إن ربنا هينصرنا ".