بالفيديو.. عزت أبوعوف عن الخوف من الموت: فكرت إني مبسوط عشان هقابل فاطيما

وصف الفنان عزت أبوعوف مشاعره قبل إجراءه العملية بالقلب كاشفًا أنه قد مر بعدة مراحل كان أخرها السعادة حين فكر في إمكانية وفاته.
وقال «أبوعوف»، الذي حل ضيفًا على حلقة «صبايا الخير»، مساء الأربعاء إنه كان رافض فكرة المرض، خاصة وأنه لم يكن يشعر بأي أعراض في القلب، فيما حاول أن يبدي تماسكًا قبل إجراء العملية بعدة أيام، ما تغير قبل موعد العملية ب3 أيام فقط، لينقلب التماسك إلى ذعر.
وأضاف: «ابتدى بقا اللي حواليا ابتدى بصتهم هم اللي تقلقني بقا، ما هم بيبصولي على إني هفتح صدري كمان 5-6 أيام خلاص، اتحدد اليوم، فعامل نفسي قال يعني أنا الواد الجن أبوعين إزاز اللي مش همه بقا، لغاية قبليها ب3 أيام بقا، خلاص يا وحش أنت داخل تفتح دلوقتي قلبك حالًا، طيب وافرض مت؟ ابتدى ذعر يجيلي بقا، طيب أنا ولادي مش مأمنهم، طيب أنا ولادي مكتبتش طيب البيت ده بتاع مين وبيت الزمالك هعمل فيه إيه.. فكرت في ولادي، لغاية أخر يوم بيحطوني على الترابيزة دي هيزقوني عشان أخش، تفتكري فكرت في إيه».
واستطرد: «وحياة العشرة والعيش والملح فكرت إن أنا يمكن أموت، يعني كلنا معرضين للموت في أي وقت، وهقابل فاطيما، وحياة ديني، فهقابل فطيما، أنا يمكن بعد ربع ساعة تلت ساعة نص ساعة ساعة ومت هقابل فاطيما».
واختتم: «فكرت إني مبسوط عشان هقابل فاطيما، يعني دي حاجة كويسة هتحصلي دلوقتي لو مت، ولو ممتش يا خسارة».