حدث بالفعل

(1)
أرسلت إدارة المدرسة فى طلب صديقى والد عمر (6سنوات)، قالوا له إن (عمر) أصاب أحد زملائه ويريدون منه أن يعالج الأمر ويضمن عدم تكراره.
فى البيت سأل صديقى ابنه عما حدث فقال له: «كنا بنلعب»، سأله عن طبيعة اللعبة فقال: «بنقسم نفسنا أربع مجموعات، الشرطة والبلطجية والجيش والشعب، فى الأول الشرطة بتضرب الشعب، وبعدين الشعب بيضرب الشرطة، وبعدين الشرطة بتجرى تستخبى والبلطجية بيهجموا على الشعب، وبعدين يظهر الجيش ويقبض على البلطجية، وبعدين نروح عاملين مظاهرة نقول الجيش والشعب إيد واحدة».
سأله صديقى عن الإصابة التى لحقت بزميله فقال له عمر: «أصله كان تبع الشرطة»، سأله: «أمال إنت كنت إيه؟»، فقال له: «أنا كنت الشعب طبعا»، سأله: «اشمعنى؟»، فقال له «علشان الشعب هو اللى بيكسب فى الآخر دايما».
(2)
هى واحدة من حفيدات أحد أهرام الفن فى مصر، تمتلك شقة فى الزمالك لكنها لا تقيم بها، منذ أسبوع ذهبت بالصدفة لزيارة هذه الشقة فوجدتها قد تعرضت لسرقة نسبية، كانت هناك أشياء غير موجودة، كانت متأكدة أن البواب هو الذى قام بالسرقة، فتوجهت بمنتهى الثقة إلى قسم الشرطة للإبلاغ عما حدث.
استدعى الضابط البواب واستمع إلى أقواله، بعد قليل فوجئت هذه السيدة بالضابط يصرف البواب من القسم بعد التوقيع على أقواله.
اندهشت السيدة واعترضت على أداء الضابط فقال لها: «قبل 25 يناير كان ممكن أجيب البواب من قفاه وأحجزه يومين ياخد فيهم واجب الضيافة بتاعه ويتوضب التوضيبة التمام ويدلنا على مكان الحاجات المسروقة من غير حتى لا محضر ولا حاجة، بس دلوقتى الوضع اتغير والسيناريو ده مابقالوش وجود».
قالت له السيدة: «صحيح إن هيه ديه المعاملة اللى كنا بنحلم بيها.. بس وبعدين؟»، فقال لها الضابط: «هنشتغل بوليس بجد.. بالقانون».
استأذنت السيدة فى الانصراف لكن الضابط استوقفها قائلا: «معلش هتشرفينا خمس دقايق ناخد أقوالك.. البواب مقدم فيكى بلاغ إنك اتهمتيه بالسرقة وشهرتى بيه بدون دليل».
(3)
على المقهى كنت أجلس فى انتظار صديق، لفت نظرى الحوار الدائر على المنضدة المجاورة، رجلان فى الخمسين، قال الأول: «يا أخى مع إن الثورة دى كنا بنحلم بيها من زمان وكنا عايزين الناس دى كلها تغور.. بس الواحد مش عارف يفرح وبقى متوتر ومكتئب طول الوقت».
كنت متحمساً لسماع رد صديقه وكنت أتوقعه عزفا للحن نفسه لكنه قال: «كان فيه واحد عيان لمدة 30 سنة ومحجوز فى المستشفى وفى يوم جه دكتور جديد وقال له مبروك إنت خفيت تقدر تخرج، من ساعتها والمريض بيدور جواه على أمراض جديدة.. يوم يحس إن عنده رجل أطول من التانية، ويوم يحس إن صدره بيزيق وكل ما يقولوا له اخرج يقول لهم طب افرض خرجت وجاتلى غيبوبة سكر فى الشارع، أو افرض جاتلى أزمة قلبية قبل ما أوصل للبيت، طب ما يمكن المرض لسه موجود بس مش باين، الراجل فضل على الحالة دى لحد ما مات.. خوفه من العالم الجديد اللى هيخرج ليه خلاه ما يصدقش إنه خلاص.. خف».
omertaher@yahoo.com