بالفيديو.. السيسي غاضبًا: «أوامر قتلنا تصدر من القفص»

قال الرئيس عبدالفتاح السيسي، إن أوامر «القتل تصدر من داخل القفص»، في إشارة على ما يبدو إلى «تلويح الرئيس المعزول محمد مرسي أثناء نظر قضية (التخابر مع قطر) بإشارات الذبح من داخل القفص».
وقال السيسي في كلمة له، أثناء تشييع جنازة المستشار هشام بركات، ظهر الثلاثاء: «خلوا بالكم إيد العدالة الناجزة مغلولة بالقوانين، ومش هنستنى على ده، إحنا هنعدل القوانين اللي تخلينا ننفذ القانون والعدالة في أسرع وقت ممكن، وخلال أيام هتتعرض قوانين الإجراءات الجنائية المضبوطة، إحنا بنقابل إرهاب لازم يبقى فيه محاكم وقوانين تواجه ده، مش هنقعد 5 سنين أو 10 سنين نحاكم، دول بيصدروا الأوامر من داخل القفص، وإحنا هنخلي القانون يواجه ده».
وأضاف: «البطل الشهيد بعزي فيه كل المصريين، وبقول لكل المصريين البطل سقط علشان مصر تعيش، وإحنا مستعدين كلنا نسقط وتبقى مصر، وإحنا بنواجه حرب ضخمة جدا، وعدو خسيس، محتاج مننا كلنا نبقى واقفين وشايفين كلنا مع بعض ده، أنا قولت الكلام ده قبل كده اللي حصل كنا عارفين إنه هيحصل، وكنا مستعدين نتحمل ده، خلوا بالكم الكلام اللي بيحصل ده أمر ليس بجديد علينا ومش هيبقى جديد علينا ده ثمن بيدفعه المصريين كلهم».
وتابع: «دم الشهيد في رقبتنا كلنا، مش في رقبتي بس، لا في رقبة كل المصريين، في رقبة الجيش والشرطة والإعلام والقضاء».
وواصل حديثه: «لسنا مرتبكين ولا مهزوزين، ولا أي حاجة، فيه غضب وفيه حزن لكن المصريين شعب عظيم مفيش حاجة، آه فقدنا عظيم، لكن واقفين على رجلينا، اللي عمل العمل ده في الأيام دي يقصد ينال مننا كلنا، ويقولنا مش هتقدروا، وإحنا لغاية دلوقتي معملناش إجراء استثنائي واحد، ومحدش يعرف إيد الدولة عاملة إزاي، إحنا بنفذ قانون لو القاضي أصدر حكم بالإعدام هيتنفذ الإعدام، لو أصدر مؤبد هيتنفذ المؤبد، دلوقتي قبل بكرة جاهزين لتنفيذ الأحكام».
وتابع: «بقول تاني محدش يقدر يغلب شعب، عايزين نعزي كل المصريين بالفعل مش بالكلام، دولة بتقوم وتطلع قدام، بأحكام ناجزة للعدالة في أسرع وقت ممكن»، واختتم حديثه: «يحيا الشهيد يحيا الشهيد.. تحيا مصر تحيا مصر».