حضرة «صاحب شارع الفلكى» وضابط «جدران الداخلية»

قلت له وبكل ثقة «تعالى نروح أنا وأنت وزارة الداخلية، ونشوف عربية مين اللى هاتتسحب»، فرد هو بألفاظ و«أصوات» يعاقب عليها «الحياء المصرى» :«داخلية مين يا اختى ...»...كانت «خناقة» بينى وبين أحد أصحاب محال الأدوات الكهربائية في شارع «الفلكى» بدأها هو بالسباق في الشارع و«الكسر» على سيارتى الخاصة، مع تنبيهى له ب«الكلاكس»، ثم قام بالوقوف «في الممنوع»، على اعتبار أن ركن السيارات في وسط المدينة أصبح ممنوعا، مستخدما العودة للخلف، وقمت بتنبيهه مجددا، ولكن دون جدوى، فقلت له بابتسامة «هو حضرتك لوحدك في الشارع».. فرد بتهكم :«آه لوحدى»، فضحكت وقلت له :«خلاص نقف كلنا معاك».. فقام بالطرق على سيارتى «يالا يا اختى».. فقلت له :«إيه قلة الذوق دى»، وجدت وجهه فجأة داخل سيارتى :«مين ده اللى قليل الذوق يا ..، أنا ساكت عشان الراجل اللى جنبك»، فقال له زميلى جمعة حمدالله :«ما أنت شتمتها»، وهو ما أثاره فقال منفعلا :«يعنى انا مش عايز اتكلم عشانك»، وفجأة ظهر شاب يبدو عليه علامات «البلطجة المبكرة» ليطرق على السيارة مجددا :«يا لا أمشى بدل ما نسحبها منك المنطقة دى بتاعتنا»، فانفعلت وقلت له :«تعالى نروح أنا وأنت وزارة الداخلية، ونشوف عربية مين اللى هاتتسحب»، فرد هو بألفاظ و«أصوات» يعاقب عليها «الحياء المصرى» :«داخلية مين يا أختى ...»، بعدها فوجئنا بشخص آخر يمسك بزميلى جمعة حمدالله من داخل السيارة، وآخر يقف ب«موتوسيكل» ويقول «إمشوا من هنا باين عليكم محترمين» وهنا تدخل أمين شرطة في المرور الذي قال له أن الوقوف هنا ممنوع، فترك «صاحب شارع الفلكى» «خناقته» معى، ومسك في أمين شرطة ودفعه، وهنا قررت «الإحتماء» بوزارة الداخلية بالفعل، لإنقاذ أمين الشرطة، وفرض قانون الدولة، بدلا من قانون «صاحب منطقة باب اللوق»، ووقفت بالفعل أمام «مدخل شارع الداخلية» وتحدثت مع الكمين الذي يحمى «جدران وزارة الداخلية»، وقصصت عليه حكايتنا، وطلبت منه مساعدتنا ومساعدة زميله أمين الشرطة، وكان هذا الحوار :
الضابط :«مالناش دعوة، ده مرور وإحنا داخلية»
أنا: «ده زميلك وبيضرب»
فقال فرد أمن آخرمع الضابط:«محدش يقدر يضربنا ده كان أيام الثورة بس!!!!»
أنا :«طيب أنا باحتمى فيك، باقولك الراجل بيهددنى إنه يسحب العربية منى في شارع الدولة، وبينه وبينكم أمتار قليلة»
الضابط بهدوووووء يحسد عليه :«روحى قسم عابدين، يخرج حد معاكى»
أنا: يعنى أنا قصاد وزارة الداخلية باقولك احمينى تقولى روحى قسم عابدين.. طيب حرك حد من عندك..بلاش.. اتصل بأى كمين قريب
الضابط: ممنوع أحرك حد أحسن يحصل هنا كارثة !!!!!
أنا: عندك حق الجدران يحصل لها حاجة.. اتصل باللاسلكى وشوف
الضابط: اللاسلكى مش شغال على الميدان مالناش دعوة.. دول مرور.. روحى اعملى محضر في القسم
أنا «باستغراب شديد للغاية»: عايز تقنعنى أنه لو حصل كارثة في ميدان التحرير دلوقتى أو في شارع الفلكى اللى وراكوا مش هاتعرفوا.. ثم قسم ايه إذا كان الداخلية بجلالة قدرها مش قادرة تعملى حاجة ولا تعمل لفرد تبعها حاجة.. انت لو مالكش اتصال بالتحرير أو بشارع الفلكى تبقى كارثة.. عموما انا لا هاعمل محضر ولا عايزاكم تعملوا حاجة.. عليه العوض.
تركت «كمين جدران الداخلية» وأنا دمى محرووووق بمعنى الكلمة، فقال لى زميلى جمعة :«مش هاممنى البلطجى بتاع الفلكى أنا هاممنى رد الظابط، ده كارثة»، عدد من أصدقائى حللوا الموقف بطريقتهم الخاصة، منهم من اتهم الضابط أنه يعرف «صاحب شارع الحكومة» ومنهم من أكد أن الضابط «خائف منه» أو خائف من استداركى له لكارثة، ولكنى تساءلت بينى وبين نفسى :«هل استدركه في شارع الفلكى.. يمكن.. لكن مايحركش عربية كمين قريبة أو يكلم كمين المرور يطمن على زميله.. ويا ترى تصريح وزير الداخلية اللى قال أي حد ليه حق ومش عارف ياخده يجيلنا.. كا يقصد به مين إحنا ولا أبناء في الوزارة.. اللى هما داخلية ولا مروووور».