باسم يوسف يكشف موقفين لوالديه في مواجهة نظام مبارك

كشف الإعلامي باسم يوسف، في صفحته على «فيس بوك»، عن موقفين لوالديه الراحلين في مواجهة النظام الأسبق برئاسة حسني مبارك.
وقال «يوسف»: «في سنة 2000 والدي كان رئيس محكمة القضاء الإداري في مجلس الدولة وساعتها كانت انتخابات مجلس الشعب. سنتها والدي أصدر 28 حكما ببطلان ترشيح نواب تبع الحكومة والحزب الوطني، من دول كان سيد مشعل وزير الإنتاج الحربي. ساعتها الراجل ماصدقش إزاي قاضي يقف في طريق ترشيحه لكرسي مضمون، بعت لوالدي ناس ورسايل، بالحنية مرة والتهديد مرات والرئاسة اتوسطت وأبويا كان بيرد أنه يصدر فتاوي قضائية تعزز الحكم وتغير وجه الانتخابات للابد».
وتابع: «الحكومة مالقتش حل إلا أنها تعمل حركة نص كم حيفتكرها اللي واعي لانتخابات 2000، إلا وهي أنها تعمل استشكال لتنفيذ الحكم قدام محكمة عابدين، عشان اقرب الموضوع، ده زي ما يكون كده فيه حكم قدام محكمة جنائية وتروح انت تستشكل قدام محكمة الأسرة، طبعا ده كان استهبال بس للأسف نفع. حتى كان فيه كاريكاتير رسمه مصطفى حسين أيامها بيوضح إزاي الحكومة تاخد الحكم من مجلس الدولة وتروح من الباب الخلفي لمحكمة عابدين».
وأضاف: «في 2001 والدي طلع معاش، ومعاه في نفس السنة طلع معاش برضة القاضي بتاع عابدين. أبويا اتغضب عليه طبعا في حين أن التاني مسك محافظ».
وعن موقف والدته في مواجهة رئيس الوزراء الأسبق عاطف عبيد، قال: «بعديها بسنتين امي خاضت معركة استمرت لحد طلوعها على المعاش مع رئاسة الوزرا برئاسة عاطف عبيد لأن مراته مسكت القسم بتاعها في أكاديمية السادات. أمي وقفت لقراراتها غير القانونية ورئاسة الوزرا عملت على اضطهادها وحرمتها من الترقية لدرجة استاذ في آخر أيام شغلها قبل المعاش. أمي كسبت تلات قضايا ضد مرات رئيس الوزرا ولم يتم تنفيذهم طبعا».
وأكد أن «المهم نفس الأب والأم دول اللي قاموا بفعل ثوري قبل ما نعرف يعني إيه معنى الكلمة دي، زي ما أيدوا التغيير بعد 2011، اتغيروا واتحولت انتماءاتهم زي أهالي ناس كتير مننا، ممكن كبر السن، ممكن الخوف عليا ممكن التأثر بالإعلام. لكن والدي على مدي كل حلقاتي في المسرح مافوتش حلقة واحدة، كان مكانه المفضل الصف التاني على يميني. وبالرغم من اختلافاتنا وخصوصا بعد تلاتين ستة، كان بييجي ويتفرج ويضحك وكنت أنا كتير أرمي الإفيه وأبصله وأشوفه مبسوط، كتير كنت باختلس النظر له في التصوير عشان أشوف رد فعله، وكان دايما مبسوط، إللي يلاحظ في الحلقات كنت بابص على يميني كتير».
واستطرد: «فيه ناس كتير قلقانة عليا وبتسأل عليا ويمكن مستغربين من رد فعلي «الهادي» للحدث الجلل ده، الحقيقة إحنا متعودين إننا نعامل الموت من منطلق إحساسنا بالحزن لفراق أحبابنا، وده طبيعي جدا، لكن أنا شايف إن أحسن طريقة إننا نحيي ذكراهم أننا نتكلم عن ذكرياتنا الحلوة عنهم والحاجات اللي نفتخر بيها في سيرتهم، الموت علينا حق صحيح، لكنه مش الحقيقة الوحيدة، الحقيقة اللي حتفضل موجودة هي سيرتهم وحبهم لينا وللحياة، الحزن شعور طبيعي، خليه ياخد وقته، لكن خللي اللي يفضل في قلبك هي الفرحة بيهم والحياة اللي عاشوها».