حرق العدو الأسير جائز شرعا

انتشر للحبيب الجفري بوست يضحد به فتوى «التحريق» التي ظهرت على الإنترنت، واستندت إليها داعش أو الدولة الإسلامية لإعدام أسيرها حيا.
وكالعادة يثور جدل حول المؤمنين ب «الإسلام الحق» في مواجهة «المنتسبين للدين من المغرضين الذين يرغبون في تشويه الإسلام»، ثم تطمئن القلوب لأننا وجدنا، كما هو الحال في كل مرة، شيخا رقيقا متزنا، يرتدي جلبابا ناصعا أبيض، ويبتسم ابتسامة حانية آسرة، ليعطينا الفتوى المريحة، في تجاهل تام ومطمئن لما هو منشور في كتابات ومواقع الإسلاميين التي قتلت الموضوع بحثا منذ زمن، وانتهت إلى أن الحكاية «مش فشت فشت قوي» على رأي عادل إمام. وأن الموضوع كأي موضوع تناوله الإسلامويون على مدى قرون انتهى به الحال إلى قطعة من الهلاظ المرن، ويمكن فهمه وتقليبه على أي وجه في أي مناسبة وبأي شكل يراه أي شخص. وأنه باختصار حلال وحرام في الوقت ذاته.
تريده حراما؟ سنخرج لك من التراث الفقهي الفريد ما يثبت أنه حرام جدا، حرام خالص، حرام بدون أي شك.
ولو أردته حلالا لن يصعب أن نجد في ركام اربعة عشر قرنا من الفقة ما يجعله حلالا. حلال أحيانا، حلال «عندما تتوافر له»الشروط الشرعية«، حلال»عند الضرورة«.. أهو أي حلال وخلاص.
لو مش مصدق اتعب شوية وشوف المواقع الإسلامية الكبيرة قالت إيه في موضوع التحريق.
في النهاية، سيعطيك المشايخ شيئا من الراحة ويقولون لك: الوزر أو الذنب، على صاحب الفتوى. وهذه، كما يقولون أيضا، هي عظمة وسماحة الإسلام.
أختر ما شئت من تخريجات ولا تثريب عليك صاحب الفتوى هيشيل الليلة. ولو عاوز تقتل وتحرق وتكفر، الفقيه ابن تيمية هيشيل عننا كلنا في يوم القيامة. اقتل انت بس وتوكل على الله، ولن تكون أبدا من الخاسرين. فلو كنت مخطئأ لك أجر.. برضه!
عندما نصل عادة لهذه النقطة ويصبح ظهرنا للحائط، يزنقك الإسلاموي من دول ويطلع لك مطوة الابتزاز.. «يعني عايزنا نلغي الدين، ونشطب الحديث، ونولع في القرآن؟ انطق؟»..
لو راجل تنطق!
هقولهالك تاني وحطها حلقة في ودنك: احنا بقى لنا في الليلة دي اربعتاشر قرن. مافيش حد حسم أي حاجة بشكل قطعي حول المسائل الخلافية وهي كثيرة. فيه فرق حسمت الجدل في دماغها ومع نفسها وفاكرينه اتحسم علشان هم شايفينه محسوم وطز في رأي أي حد تاني، لإنهم شايفين كلامهم كلام ربنا.
فيه ناس مستعدة تقتلك لو مش مقتنع إن النتايج اللي وصلولها مش تخريجاتهم ولا فكرهم.
«ده كلام ربنا يا راجل حتى اسمعني بس أنا مش جايب حاجة من عندي».
ممكن نكمل كده اربعتاشر قرن كمان لو عاوز. وكل ما يحصل كارثة زي كارثة حرق بني آدم حي باسم الدين هنعمل نفسنا زعلانين ونشتم اللي بيشوهوا الدين وييجي الحبيب الجفري يطبطب علينا ويقولنا دول وحشين واحنا إسلامنا جميل مفيش فيه حاجة زي كده.
مع نفسك..
انت فاكرها سهلة ان ناس بيسيبوا بيوتهم وعيالهم ورزقهم وأهلهم ويجروا ورا شوية قطاع طرق شايلين الرشاشات والبازوكا وكتاب الله، في افغانستان والرقة؟ تفتكر كان سهل عليهم يسيبوا أطفال وزوجات ويضحوا بكل حاجة علشان يعيشوا في كهوف في الصحرا والجبال؟
خالص..
دول قروا في الدين وفي الفقة وسمعوا مشايخ أكتر منك عشر مرات قبل ما ياخدوا القرار ده.
ولما عملوه كانوا مقتنعين إن ده الصح المطلق وانهم مش مستندين على فراغ ولو واحد فيهم لعب معاك لعبة العقل والا النقل، وكنت مسلم معاه بداية إن النقل أولى من العقل، هياكل بعقلك عيش وحلاوة، وآخر النهار هتستلف من اصحابك حق تذكرة وتحصلة على الدولة الإسلامية.
كلمتين تطييب الخواطر اللي بتخدر بيهم المشكلة مش هيحلوها. هتحصل تاني وتالت، وانت مش هتبطل استغراب كل ما تلاقي جار لك في البيت أو زميل من المدرسة أو قريب اتربى معاك وكان قريب ليك، خد ديله في اسنانه وسافر على اخواته في الدولة الإسلامية، وطلع على النت وهو بياخد اوتوجراف وسلفي مع فتى داعش المدلل، إسلام يكن الشهير بأبوسلمة.
اخواتك بتوع الدولة الإسلامية عندهم ناس دقنهم أطول من بتاعة الحبيب الجفري تلات مرات، وجلاليب أكثر بياضا، والهري اللي احنا بنعمله حوالين النصوص هم حافظينه أحسن مني ومنك ومدعمينه بكلام ابن تيمية وغيره من فقهاء عصره.
كمل كمان اربعتاشر قرن بنفس الشكل لو عاوز.
لكن فيه خيار تاني. ممكن تكسر دايرة الشر وتشغل دماغك وتعرف إن إسلامك هو اختيار في الأساس، وإن أعمال العقل تكليف ديني. وإنك لازم تحدد الاختيار قبل ما تشوف النص مش العكس. النصوص وظروفها وتخريجاتها متباينة وتختلف باختلاف المفسرين وظروف العصر، وموجود منها أشكال وألوان.
المهم انت مين ويناسبك إيه.
حدد اختيارك الأول.. عاوز تبقى بني آدم واللا بني وحش.
لما تعرف، افتح المصحف والصحيحين وكتب التراث، ودور على اللي بيتفق مع فطرتك ومع هواك.
اشترك الآن لتصلك أهم الأخبار لحظة بلحظة