الحضري للشعب المصري: «آسف»

قدم عصام الحضري، حارس مرمى المنتخب، الاعتذار للشعب المصري على عدم التأهل لنهائيات كأس الأمم الأفريقية، عام 2015، قائلًا: «بتأسف للشعب المصري ككابتن للفريق ونيابة عن زملائي».
وأضاف الحضري، في تصريحات لقناة «mbc مصر 2»، الخميس: «ماحدش من اللاعيبة أثر، وماحدش من الجهاز الفني أثر»، رافضًا إقالة المدير الفني للمنتخب، شوقي غريب، من منصبه.
وقال: «أنا ككابتن فريق أنا بشكر اللاعيبة، ولو كان اتحسبتلنا ضربة جزاء كنا هنبقى 2 صفر، وكنا نتمنى نكسب»، مشيرًا إلى أهمية وجود «الخبرة» بين اللاعبين في الملعب.
وأوضح: «إحنا من الأول كان لازم يخش معانا مجموعة شباب وإحنا مكسرين الدنيا في 2010»، معتبرًا أن «كابتن شوقي عمل اللي عليه، ومش عاوزين نبقى زي الناس كل ما يحصل مشكلة نغير جهاز فني».
كما تساءل: «ليه مانديش الثقة، وليه الراجل مايبقاش موجود ويشتغل ويبقى حافظ لعيبته ل2018، تغيير جهاز فني إزاي؟».
وأضاف: «مقتنع بأن الجهاز الفني على مستوى عال، والجهاز الفني لازم يكمل، وبكرة اللي جاي (المدرب الجديد) لسه هيجي، وندخل تصفيات كأس العالم ويبقى فيه مشاكل ليه الراجل (شوقي غريب) مايخدش الثقة ويشتغل».
واستطرد: «مرينا بفترة صعبة وفترة توقف الدوري وتغيير جيل، وفيه ناس باصة لمصر بأنه بطل أفريقيا ودي تالت مرة مايدخلش كأس الأمم، والكورة دي الحاجة الوحيدة اللي بتسعد الشعب المصري، ونتقبل النقد»، داعيًا إلى الابتعاد عن «العواطف» في تقييم أداء المنتخب، مطالبًا ب«فتح صفحة جديدة».
شاهد أخبار الدوريات في يوم .. اشترك الآن