فيديو.. «الجندي» يتهم ريهام سعيد بازدراء الأديان: «شبه نايمة على الشيزلونج»

طالب الشيخ خالد الجندي في برنامجه «نسمات الروح» على فضائية «الحياة 2»، بمحاكمة الإعلامية ريهام سعيد بتهمة ازدراء الأديان، بعد استضافتها لإحدى الملحدات في برنامجها على قناة «النهار».
وقال «الجندي» إن «المذيعة هانم»، حسب وصفه، تعمل على إثارة البلبلة وغير متخصصة في إدارة هذا النوع من الحوار، مُضيفًا «دي عمرها ما احترمت مشاهد، وعمرك ما تفتح على برنامجها إلا وتلاقيها شبه نايمة على الشيزلونج، ورجليها في وشك، مفيش احترام للمشاهد أصلا.. فين أخلاقيات وآداب البيوت».
وتابع: «مش من المناسب إني أجيب واحدة غير متخصصة أصلا في النقاش، وقبل كدة دخلت الجن في بيوت ناس بالوهم وجابت ناس نصابين، وواحد بدقن قعد يطلع العفاريت لواحدة بتدمع دم.. كسفونا وفضحونا وخلوا الناس كلها تضحك علينا».
وواصل حديثه: «مقدمة برنامج جابت واحدة بتريل على روحها، حاطة إشارب زي المنخل على وشها قال عشان ماتتعرفش، وطالعة بتستفرغ وبتقول كلام عبيط ومتخلف وعيب ولا قيمة وقلة أدب وغير محترم.. والهانم اللي مسمية نفسها إعلامية جايباها عشان تدير معاها حوار، أي حوار، هو الحوار إني أجيب ناس تشتمك، وياريت تشتمك في أهلك، لكنها بتشتمك في معتقدك، شتمت الديانات التلاتة، شتمت اليهود والمسيحيين والمسلمين، وطلعتنا متخلفين ومهرطقين وإن مفيش إله.. مطلعة واحدة مجنونة، يا جماعة انتو عارفين أحوال البلد الاقتصادية، مفيش سرير فاضي في مستشفى الأمراض العقلية وبيضطروا يرموهم في الشارع».
وقال: «المذيعة هانم طلعت ترد بكل لا مبالاة على الجمهور والناس اللي في حالة فزع ومش مصدقة، وتقول دي عندها (الملحدة) 50 ألف متابع على الإنترنت، إحنا مالنا، الإنترنت ده عبارة عن مراحيض عمومية.. واحدة مجنونة عقليا أنا ذنبي إيه، ولادي وجيراني يشوفوا ده، والناس ثايرة وبتقولي إلحق بتقول مفيش جبريل.. لابد أن تحاسب هذه المذيعة، هذه حالة إزدراء أديان».