400 جنيه

حكومتنا الرشيدة ربنا يجعل كلامها خفيف عليا وعلى الهارد بتاعى
أعلنت بكل فخر وبلا أى خجل ان 400 جنيه حلويييييييييين ومقضيين ويكفو ويفيضو وهنحوش منهم كمان
وواضح من كلامهم كده اننا شعب فراعنة طماعين وعنينا فارغة وميملاهاش إلا التراب
والناس فى دولة فيحان لما اللحمة تغلى مبياكلوهاش
والخيار
والطماطم
طب السكر
طب الخضار
والمفروض كل شىء يغلى نقاطعه
هيا دولة فيحان أحسن مننا فى أيه؟؟؟
طب هناكل أيه؟؟؟
وليه الأكل من أصله
والحقيقة حين درست أقل كميات يمكن للإنسان المصرى والمصرى فقط دونا عن خلق الله فى كل بلاد الدنيا يمكن أن يأكلها وتمده بكافة مايحتاجه الفرد من مواد غذائية لازمة لجسمه لكى يعيش فقط
مش لازم يتخن ويربرب ويوصل وزنه 130 كيلو زى الواد أبن عمى اللى لولاه كان عمى بقى من أثرياء مصر بس صرف كل اللى بيكسبه على الواد وأكله الكتير
أو مش لازم يطول ويطول ويطول ويطول زى الواد ابن خالى اللى بيقعد على السفرة وبطنه مفرودة ويفضل يأكل لحد أبو 10 جنيه عيش اللى أبوه مشتريه م يخلص
وبعد دراسة متأنيه وعبقرية وإشتغل فيها معظم خبراء التغذية واللا تغذية وعلماء تغذية المصريين (علم من إختراعى وهسجله بإسمى واللى هيقول اللفظ ده تانى هجرجره فى المحاكم )
فوجئت بمفاجأة عبقرية وقنبلة مدوية
هتقلب الدنيا رأسا على عقب ... وأحيانا عقبا على رأس
وهتقلبها مرة بالطول ومرة بالعرض ومرة ب الورب ومرة على جنب
وجدت أن الإنسان المصرى فقط وهو إنسان أنوى نادر (على رأى يوسف وهبى فى فيلم شنبو ) جسمه غير جسم بنى آدمين كوكب الأرض التانيين الوحشين الطماعين
جسم الانسان المصرى يحتاج الآتى
3 جرام ونص لحمة مرة كل شهر ...ومش لازم كل شهر
خيارية واحدة بس فى الأسبوع
عودين ملوخية مرة كل أسبوع
15 حباية بسلة مرة كل أسبوع
45 حباية فول مرة كل يومين
( مش هنقدر نمنع الفول عن المصريين لأنه سر تفردهم عن باقى مخلوقات كوكب الأرض)
رغيف وربع كل يوم وممكن نص رغيف كل يومين
3 حبات طماطم ( البنادورة بالنسبة لاخواننا الشوام ) كل أسبوع
زجاجة زيت مرة كل شهرين
كيلو سكر مرة كل 3 شهور
باكو شاى 100 جرام مرة كل 3 شهور
(وكييفة الشاى زى حالاتى ينقو حيطة شكلها شيك يخبطو دماغهم فيها أو مش لازم شيك بدل م يركبو القطار يرمو نفسهم تحته)
فرخة كااااااااااااااملة مرة كل 4 شهور( انشاء الله ما حد حوش )
وماعدا ذلك فهو ترف وأكل زيادة
وعيب علينا الأكل الزيادة
هو احنا بنى آدمين ولا حاجة تانية ؟؟؟
احم احم ... لامؤاخذة يعنى
واكتشفت بعد هذه القنبلة المدوية والتى ستقلب الدنيا عقبا على رأس أو رأسا على عقب وهتقلبها بالطول وبالعرض وب الورب ومن كل الزوايا
اننا شوية فراعنة طماعين متزمتين منخرطين إمبرياليين بورجوازيين متهوسين ولربنا غير حامدين
ولذلك فالحكومة فعلا عندها حق
ال 400 جنيه يكفو ويزيدو ونحوش منهم كمان
والبنوك هتتملى فلوس بسبب تحويشنا من ال 400 جنيه
وهيدورو على حد يدوله قروض مش هيلاقو
اذا كان إحنا بنحوش هناخد قروض ليه ؟؟؟
وبالتالى الحاجة سعرها هينزل الأرض لأننا هنصدر كل باقى الحاجات اللى مش بناكلها
طبعا مش مصدقين كلامى
والله شكلكو مش مصدقين
صدقونى انتو مش مصدقين
طب أجيب لكم دليل إننا شعب غنى وفييس كمان
شوفو أكوام الزبالة المرمية فى الشوارع
طب بذمتكو وعينى ف عينكو ياشعب طماع لما أنتو مش لاقيين تاكلو اومال إكوام الزبالة اللى مالية الدنيا دى بتيجى منين ؟؟؟
مش دى بواقى أكلكو وشربكو
ده انتو خليتو الحكومة جابت شركات من بره بالعملة الصعبة والسهلة أحيانا علشان تشيل بواقى الأكل بتاعكو
لسه مش مصدقين ان ال400 جنيه كتير؟؟؟
طب أجيب دليل تانى ؟؟؟
ماشى
دليل تانى أهو
المجارى الطافحة فى المناطق الشعبية بالذات هى أكبر دليل على ان مفيش فيكى فقير يامصر
هو انتو لو بتاكلو على قدر م انتو محتاجين بس .....كنتو هتحتاجو مجارى ولا حمامات من أصله ؟؟؟ولاصرف صحى اساسا؟؟؟
لسه مش مصدقين ؟؟؟
طيب دليل تالت
علشان تعرفو انكو شعب فراعنة وطماعين ومنخرطين ومتزمتين وبرجوازيين ومتهوسيين ولربكم غير حامدين
دليل قاله رجل الاعمال الكبير ...أوى
وقائد عام الحديد فى مصر
وأحد قيادات الحزب الحاكم حاليا
أحمد عز
قال بالحرف الواحد / إزاى الشعب ده مش لاقى ياكل اومال العربيات اللى زاحمة الشوارع من كل شكل ولون دى مين راكبها ؟؟؟
عنده حق والله
وسؤال منطقى برضه ... لا ... ده عنده مليون حق
صحيح والله ...لو... إحنا جعانين زى م احنا بندعى ...هنركب عربيات إزاى ومنين ؟؟؟
يبقى أكيد أكيد إحنا شايلين على قلبنا قد كده وأكتر من كده كمان
بس ...تحت البلاطة
ومن هذا المنطلق الفكرى الناتج عن البعد البؤرى المتشعب فى اللانهائية الكونية المنبثقة عن المعقول واللا معقول
وإدينى فى الهايف وأنا أحبك يافننس
أقول وبكل ثقة ياشعب مبيشكرش ولايحمدش ربنا
ان ال400 جنيه كتير علينا
والحكومة ياولداه هتجيبلنا منين
وانا لو مكان رئيس الوزرا
اكنس علينا السيدة زينب واتشحتف
وادعى ربنا
واقول
يارب اصحى من النوم ومالاقيش الشعب ده
ولذلك
ادعو الحكومة انها تفكر مليون مرة و م تمشيش ورا بتوع المعارضة اللى عايزين جنازة ويشبعو فيها لطم
ويفكرو بعد المليون مرة مليون مرة كمان
ويخلوهم 300 جنيه بس او 322 او 343
اصل بطرس غالى(وزير المالية ) راجل شاطر و بيحسبها بالنكلة وميعديش عليه الهوا
وأنا من هذا البعد أقول
أن الحد الأدنى للأجور له فوايد كتير من أهمها
اننا هنموت من الجوع
واللى هيقاوم هينتحر لأنه مش قادر يصرف على البيت
واللى هيقاوم هيجيله السكر والضغط والقلب وبرضه مش هيطول فى الدنيا
وفى كل الاحوال الشعب هيخلص هيخلص
لنا الله من قبل ومن بعد