**( روبابيكا)**

روبابيكا
عجبى عليك يازمان
لسه عايش فيك إنسان
من صنف آدم أو حوا
رغم إللى كان وإللى إتسوا
برضك هو إنسان زمان إنت وهو
ياترى لسه فاكرين عنتره !!!
ولاإيه إللى جرى... ياهل ترى؟؟
خبريه ياخلق ...مال قلوبكم مسنكره
عالجبن قدام الإفترا
سيفك ياأبوزيد مالوش معنى
ولا راية حق بتجمعنا
وشجاعة الرأى خلعناها
وعلى شماعة العيش علقناها
والشهدا خلاص نسيناها
ربك وحده أحياها !!!
ألله حى... الله حى الميت حى الميت حى
إمال إيه عارف ليه...؟
ياما فى عداد الاموات أحياء
وياما فى عداد الاحياء أموات
وخلق بتخطف وخلق بتنهب
وخلق بتحميها فتوات
وتحت القبه...!
ياعم دا كله خناق أغوات
التعلب فات ؟
طبعا فات وفديله من الجنيهات ألوفات ألوفات
مين يقدر عليه
عبيد ورثهم عن والديه
وفين عرابى وسعد باشا والنحاس
مالكو ياناس؟؟؟
محدش قادر ينطق حق
طب قولوا آه ... طب قولوا لاء
عندك حق
عجبى عليك يازمان
لسه عايش فيك إنسان
روبابيكيا
إنسان قديم للبيع
تحف ...نجف...شرف
ياعم فضها سيره...وبلاش قرف
عايزين حبة ترف
مشى حالك على كده كله
ربى عيالك وإوعى تقوله
ليه مفيش أمانه!!!؟؟؟
طبعا فيه...
ألف رحمه ونور عليه
صاحبها تايه من سنين
قوم بينا ندور عليه
عجايب وليه ساكتين
سكارى ولا مطحونين
م الدوخه مبقيناش عارفين
إيه الفرق مابين الإتنين
مره شمال ومره يمين
امال إيه مش لعب عيال
لا وحياتك دا لعب كبار
دليلى إحتار...!
عجبى عليك يازمان
لسه عايش فيك إنسان
ياعم روق...عمر كلامك ما يحوق
خليه شويه متزوق
سميها لباقه ... سميها كياسه
وما تنساش كتر لى الفته فى الطاسه
دى سياسه...!!!
وإوعى تنسى في مره ياذوق
عمر الميه ما تتطلع فوق
خليها شويه بلطافه
وبلاش مشاكسه وشغل هيافه
بيع شعارات تكسب ألوفات
وتعيش عيشة المليونيرات
عجبى عليك يازمان
لسه عايش فيك إنسان
دا لاصنف آدم ولاحوا
دا صنف بعيد عنك على الأرض بيتلوى
برضك إنسان زمان إنت وهو...!!!؟؟؟