«خطوبة» على «الرصيف»

« يا آنسة.. لو سمحتى.. لو سمحتى.. أنا مش بأعاكس أنا معجب بيكى وعايز أتقدملك!! والله أنا جاد جدا فى طلبى!! «هل صادفت هذا الموقف وأنت فى الشارع.. أو المترو أو الأتوبيس؟! سؤال غريب والطلب أغرب إلا أننا عندما سألناه للفتيات والشباب وجدنا عندهم حكايات كثيرة مع هذا الموقف!
سألت «هى» الشباب: «هل من الممكن أن تقدموا فعلا على هذه الخطوة؟ وبجدية تامة أم لا»؟ عمرو محمود قال: «لأ طبعا» بالنسبة لى فكرة مش مطروحة، مايصحش أوقّف بنت فى الشارع واطلب أيدها حتى لو عجبتنى، وبالرغم من أنها ممكن تكون محترمة وكويسة لكنى أفضل الارتباط بناء على معرفة عائلية أو معرفة عمل.
أحمد سعيد اختلف تماما عن عمرو وبطريقة عملية من خلال تجربته «لم أكن أضع فكرة الزواج فى عقلى بشكل جاد لكنى تحمست له عندما شاهدت زوجتى الحالية قبل ثلاث سنوات، فهى لم تكن جارتى بشكل مباشر، ولكنى كنت أراها دائما وأنا ذاهب للعمل تقف فى الشارع مع زميلاتها، تنتظر أتوبيس المدرسة حيث تعمل مدرسة، ومع تكرار رؤيتى لها أعجبت بها، وكنت مترددًا فى الكلام معها حتى لا أفهم بشكل خاطئ ولكن عندما تغيبت يومًا ذهبت لزميلاتها، وسألت عنها وبعد يومين عندما رأيتها أبلغتها بطلبى التقدم لخطبتها، وقد كان».
«اقلب القدرة على فمها تطلع البنت لأمها» على غرار هذا المثل كان زواج محمد إبراهيم، بعد أن دخل فى حوار مع إحدى السيدات المحترمات – على حسب وصفه – كانت تجلس إلى جواره فى المترو فقرر أن يتزوج ابنتها! محمد قال «وجدتها سيدة محترمة ودمها خفيف جدا، تكلمنا فى حال الدنيا وشعرت أننى أعرفها وكأنها أمى أو خالتى، فسارعت بسؤالها: حضرتك عندك بنات؟ فقالت: بنت واحدة فى الليسانس، قلت لها «لو مش مرتبطة أنا عايز أتجوزها.. أكيد هى طالعة لك، واتجوزتها لأن الجواز فعلا نصيب ممكن يأتى فى أى وقت».
ابتسامة عريضة ارتسمت على وجه منى تبعها سؤال ساخر «وأنت عرفتى منين أن ده حصل معايا فعلا؟» وأضافت: «الموقف ده حصل معايا بجد، كنت راجعة مع أصحابى من الجامعة وركبنا المترو كالعادة وطول الطريق كنا بنهزر ونتكلم، وفوجئت بسيدة فى الخمسين من عمرها تسألنى إنت مرتبطة اعتقدت أنها عايزة تفتح معانا حوار وده بيحصل دايما فى المترو، المهم قلت لها «لأ»، فطلبت منى رقم تليفون البيت، فسألتها ليه؟
فقالت بصراحة أنا عندى ابن بيدور على عروسة وأنا أعجبت بيكى وبطريقة كلامك وعايزين نتقدم لك، وبعد يومين بالظبط فوجئنا بتليفون منها تطلب المجىء للبيت وفعلا حضروا وحدث توافق وسألنا عن بعض كويس واتخطبنا».
نرمين أحمد قالت: بالرغم من أنى لم أكن أتخيل أن الموقف ده يحصل معايا لكن حصل بالفعل ، اعتقدت فى البداية إن فيه شىء وقع من يدى والتفتّ له فقال «بعد إذنك عايز اقولك حاجة.. أنا معجب بيكى وعايز أتقدملك، أنا بتكلم جد والله» وبالرغم من كريزة الضحك التى كادت تصيبنى بفعل المفاجأة لكن بسبب مظهره المحترم وطريقة كلامه أنهيت الموقف بذوق وقلت له «أنا آسفة جدًا أنا مرتبطة».
أما عبير محمود، فرفضت الارتباط بهذا الشكل قائلة «أولا أى حد ينادى علىّ فى الشارع ما بردش عليه لأن فيه شباب غير مهذب وبيعاكس، لكن لو فرضت أنى سمعت له أعتقد أنى «مش هأوافق على الطلب ده».