الجزمة

فى بلدنا اللى ماليها محطة
والقطر بتاعها بيدهسنى
دى الجزمة وبتقول لصاحبها
إتأدب وانت بتلبسنى
لحسن هاعملها وهاتفرتك
ولا تقدر رجلك تلمسنى
من أسوأ جلد أنا مصنوعة
مفروض م الخدمة أنا مرفوعة
وهاخلّى أصحابك يقولولك
أبو جزمة قديمة ومقطوعة
وإياك تعملها وتلبسنى
الراجل طق من اجنابه
وبسرعة اتنرفز ع الجزمة
من يوم ما عرفتك وأنا حافى
مش شايف لألطتك لزمة
مكعوبة ودايبة ومحروقة
واطية وم الجامع مسروقة
وشك محول وبينرفز
وأنا رجلى فى وشك مزنوقة
باتدارى م الناس وأنا لابسك
وإن شافك حد بيوكسنى
شكلك والعالم يعاكسنى
الجزمة إتقلعت من رجله
وقالت له تبقى تحصلنى
راح أطلق رجلك والورقة
وبسرعة لازم توصلنى
وهاسيبك للأرض يا حافى
والشق فى رجلك مش خافى
ولا يوم هاتقابلك أوصافى
ولا هارضى فى رجلك تحبسنى
إتأدب وانت بتلبسنى
الراجل من غيظه اتنرفز
أنا مش هاخضعلك ولا أعانى
مش هاسمع قولك ولا أطلق
والشاطر يقدر ع التانى
وهاجيبلك ضرة تهنينى
من قابلك جاهزة وعجبانى
وهاقصك شبشب وهاذلك
وهاسيبك للطينة وأبلك
وإن ميلتى لغيرى راح أقوله
دا قليلة الأصل وقرفانى
وإن جيت ألبسها بترفسنى
علشان بغرورك تقوليلى
اتأدب وإنت بتلبسنى
الجزمة اتشالت واتحطت
وقالتلى أنا أصلى صريحة
وإن كنت مناكف مش ناوى
أنا هاخلع رجلك بفضيحة
وهاجيبلك كام فردة عمولة
تديلك ع الصبح طريحة
وإن كان مش عاجبك إشكينى
أنا باضرب تحت ودكاكينى
يمكن فوق راسك تلاقينى
لبسالك جينز وبكينى
وساعتها تقدر تحبسنى
اتأدب وانت بتلبسنى
محمد إبراهيم أبوعصفور