قبل أن تتظاهر

عزيزى المواطن التظاهر حقك - ماقلناش حاجة - بس قبل ما تتظاهر اقرأ القانون، وانت عارف إن كله دلوقتى بالقانون، إوعى يغرك انك اتظاهرت قبل كده وجت سليمة، وهتفت واعتصمت وروحت بيتكم، اللى فات ده حمادة، واللى جاى حمادة تانى خالص. عارف طبعا إن المظاهرات لمت، وبقى فيه عنف وتحريض وبلطجية وناس بتشتم، تخيل فى مصر ناس بتشتم. المهم يا سيدى علشان الهرج والمرج اللى حصل ده، مجلس الشورى قرر وضع قانون جديد للتظاهر، قانون «الحق فى التظاهر».
بيقول إيه مشروع قانون «الحق فى التظاهر»، الذى تمت الموافقة عليه من حيث المبدأ وكلها أسبوعين ويبقى قانون؟ بيقول إن النظام حلو، والطيب أحسن، وبالاتفاق الأمور تمشى، يعنى عاوز تتظاهر براحتك، بس قول لنا قبلها بثلاثة أيام. إخطار صغير كده للقسم اللى طالعة من دائرته المظاهرة، تسلمه باليد وتأخذ الوصل. تكتب فيه إيه؟ بياناتك انت وأصحابك اللى منظمين المظاهرة، أسماءكم وعناوينكم وتليفوناتكم، عادى يعنى، وبيانات المظاهرة: أسبابها، وخط سيرها.
بعد ما تبعت بيانات الرحلة، أقصد المظاهرة حتحصل حاجة من اتنين، يا إما وزير الداخلية يبلغ مطالبك ومطالب أصحابك للجهة اللى انتم قررتم تتظاهروا ضدها فيعملوا لكم اللى انتم عاوزينه أو يجتمعوا بكم وتتفاهموا، ومن نفسكم تلغوا المظاهرة، أو مايحصلش اتفاق لا قدر الله، ففى الحالة دى تجتمعوا بإحدى اللجان اللى حيشكلها وزير الداخلية برئاسة مدير أمن المحافظة علشان تشوفوا حتحافظوا على الأمن وتحموا الممتلكات أثناء المظاهرة إزاى.
ده لو انت من اللى بينظموا مظاهرات، طيب لو انت مواطن عادى بس بتتخنق من وقت للتانى فتاخد الأولاد وتنزل تمشى شوية فى مسيرة، مفروض تعمل إيه وما تعملش إيه؟ بالنسبة للأوراق والإجراءات مش مطلوب منك حاجة خالص، وأعتقد إن دى ثغرة فى القانون، لأن مفروض الدولة تبقى عارفة وبدقة مين اللى فى المظاهرة ومين اللى بيتفرج عليها فى التليفزيون. لكن تقريبا علشان فلسفة القانون قائمة على أن منظمى المظاهرة مسؤولون عنها، لم يهتم المشرع بأن يكتب المشاركون فيها إقرارات بالتزام السلمية والحفاظ على المنشآت العامة.
المشكلة اللى حتقابلك لو المدام منقبة مش حتقدر تاخدها معاك، لأن المادة 13 تجرم ارتداء «الأغطية التى تخفى ملامح الوجه»، فلو اتمسكت أسبوع حبس أو غرامة ما بين 20 و50 ألف جنيه أو العقوبتين، بالضبط كأنها نزلت بسلاح ومولوتوف.
معنى كده إن حقك فى التظاهر راح خلاص، انتهى؟ إطلاقا، مادة 11 من مشروع القانون تنص على أن يحدد كل محافظ فى محافظته منطقة كافية يباح فيها التظاهر دون إخطار، هايد بارك، سيكون فى كل محافظة فى مصر هايد بارك، وسنستمتع جميعا بالحرية والأمن والبنبون.
Mona-rahman@live.com