النيل بيبكى

زعلان كتير من جيرانه.. والحق كله معاه
بيقول: حرام تهملونى، أنا رسول الخير
وأنا اللى عمرى لكم شريان أمل وحياة
■ ■ ■
من قبل خوفو ومينا، قبل الزمان بزمان
وأنا اللى باجرى لكم بالخير فى كل مكان
أنا أساس الحضارة.. واسألوا هيردوت
وجعلت من أرضكم جنة وأنا رضوان
■ ■ ■
أنا اللى باجرى لكم بالسعد والخيرات
وأنا اللى ياما كتب عنى التاريخ حكايات
أهون عليكم وأصبح فى بلادى غريب
وف وشى ترموا الزبالة، وتصرفوا الفضلات
■ ■ ■
من بعد لليل السمر والفن والمواويل
والحب بينى وبينكم جيل يسلم جيل
ضاع احترامى وضاع الحب والإخلاص
وبقى اللى بيموت حماره يرميه فى روش النيل
■ ■ ■
أنا اللى كفى لكم على الوفاء ممدود
ونبع خيرى يا ناس فياض وماله حدود
يكون جزائى الجفا والصد والإهمال
هو جزاء الوفا يبقى جفا وجحود
■ ■ ■
عاتب عليكم يا أهلى فى المدن والريف
لوثتوا ليه ميتى بعد ما كنت نضيف
وهان عليكم صفائى اللى عمره ماهان
منكم ومن فعلكم باصرخ وأقول يا لطيف
محمد حسبو الأقرع 
مدير عام سابق بالتربية والتعليم عضو اتحاد الكتاب