جاء من الصعيد فى القطار القشاش.. قطار الغلابة إياه، حيث سعر التذكرة مقدور عليه.. ليس مهماً أين ستجلس أو هل ستجلس أم تأخذها وقوفاً.. المهم شىء يتحرك ويوصلك.. سألت وقال: القطار كما هو.. لم يتغير فيه شىء.. القطار نفس القطار.. الأرفف هى هى.. الكثيرون مازالوا ينامون فوقها.. الأرض متسع للجميع.. سطح القطار ذات نفسه مكتظ بالزبائن.. وبوابير الجاز والشاى؟!.. زى ما هو البابور.. والشاى الكباية بجنيه لا شىء تغير عما قبل.. هذا الرجل الصعيدى بالمناسبة هو أحد الناجين من حادثة قطار العياط الذى احترق عام 2002 فى شهر فبراير.. وقد عانينا بشدة من أجل أن نعرف مصيره ثلاثة أيام حتى وصل إلى «الحاجر» مركز «إدفو»، وعلمنا أنه نجا بأعجوبة.. تذكرت هذه الحادثة وأسئلتى وإجاباته وأنا أشاهد إعلانات «سكك حديد مصر»، والإعلانات تشير إلى أن تخريب القطارات الجديدة «نوڤى» اللى هى بفلوس ضرائب الغلابة، يتم بواسطة ذات نفس الغلابة يا سبحان الله.. واحد يقطع الكراسى والثانى يكسّر الرف والثالث يحفر فى الشباك.. والصوت الرخيم يقول متفائلاً: تفتكروا فيه حاجة هتتغير؟.. متفائل جداً.. ثم يقول.. إن السكك الحديد ملكنا إحنا الشعب والوطن والناس.. شىء غريب قوى الإعلان ده.. هو دعاية للحفاظ على القطر الجديد نوڤى؟ من مين بقى؟ معنى هذا الإعلان إن الحكومة يا عينى عمالة تصرف وتشترى وتشحت علينا من اللى يسوى واللى ما يسواش عشان ننضف ونركب باحترامنا وأدبنا لكن تقول لمين، اتضح إننا شعب مش فالح ومالوش حل بيعمل حاجات غريبة.. يا دوب يلاقى قطر جديد بورقته يجرى عليه وهات يا تدمير وتخريب، ليه؟؟ ما حدش عارف يعنى مرض ولا جنان ولا حساسية؟ الله أعلم.. الأول يركب قطر جديد نظيف وفجأة يطلع مطوة قرن غزال ويروح مقطّع الفرش كده.. منه لنفسه من غير أى سبب.. طبعاً لو مؤلف الإعلان تعب نفسه شوية وسأل ناس عواجيز زى أصحابى هايقولوا له إنهم زمان كانوا بيعملوا كده فى الأتوبيسات بعد التأميم عشان ياخدوا الإسفنج يعملوا بيه كرة شراب.. دلوقتى بقت الكور مالية الدنيا، هذا غير إن حمل المطوة هذه الأيام يودى فى داهية من غير حاجة. الثانى يركب القطر الجديد الجميل ويقعد فى كرسى زى الناس الكويسة وفجأة تجيله الحالة يقوم ناطط وعاضض بأسنانه على رف القطر الفوقانى ونازل فيه ضرب بالدماغ والشلاليت عشان يكسره حتت حتت.. الثالث بقى يبص للشباك الأبيض الجميل وفجأة برضه يطلع مسامير من جيبه وهات يا حفر فى الشباك الجديد زى المهاويس.. وهذا معناه إن السكك الحديدية ضحية لشعب من الملاحيس المجانين اللى مش لاقيين مستشفى يلمهم.. وعاوزين كهربا على دماغهم لكن مافيش أجهزة تكفى. والظاهر إن الكلام ده مظبوط.. لأن هيئة السكك الحديدية والقطارات التابعة لها.. أصلهم «سبيل للغلابة».. والهيئة نفسها لا ليها إدارة ولا ليها صاحب ولا تقدر تفتح عينها فى أى فرد من أفراد الشعب العامل والعاطل، لذلك لا يوجد أى قانون يجرم ما يحدث من الشعب الذى يخرب الهيئة وقطارات الهيئة وكراسى الهيئة ويعض فى أرفف قطارات الهيئة بأسنانه، وما حدش يقدر يقول له تلت التلاتة كام.. ولا يوجد فى هذا البلد المسالم عسكرى واحد يوحد الله ولا ضابط واحد يوحد الله يقدر أو يستجرى يمسك راكب مخرب، ولا توجد شرطة سكك حديدية ولا حتى أمين شرطة، اسم الله، يمشّى رجليه رايح جاى فى القطار.. كله ده والحكومة مكسوفة، ووشها مننا والأرض، ومش عاوزة تعمل أى قانون يجرم تخريب الممتلكات العامة.. والله حكومة حنينة.. لأ وإيه ذوق.. ذوق.. ذوق.
