وطن يعيش بحقنة «التبرعات»

«تعاطفك لوحده مش كفاية.. اتبرع ولو بجنيه» بهذه العبارة بدأت أشهر حملة تبرعات لصالح مستشفى 57357 لعلاج أطفال السرطان. لم تكن حملة التبرعات الشهيرة سوى إشارة لما وصل إليه حال «مصر المحروسة»، حملات تبرع لحل مشاكل فشلت الحكومات المزمنة فى حلها، فجوات فى ميزانية لا يعرف المواطن عنها شيئا لا حل لها سوى «التبرع».
 فى طابور الفشل كان معهد الأورام الآيل للسقوط حسب التقارير الهندسية آخر «المحتاجين» إلى التبرع لم يكن معهد الأورام لكن هناك فى صحراء سيناء آلاف المشردين تقدم بعضهم ب 114 بلاغا رسميا للنائب العام ينتقدون فيها «اختفاء المساعدات» التى تبرع بها المواطنون لنجدة مصريين غرقوا فى سيول مفاجئة وفشل حكومى دائم.
فى كل مكان يجد المواطن أمامه صندوقاً للتبرعات، فى المستشفيات، فى المطاعم الكبرى، فى الأماكن السياحية، وعلى الجدران وأمام النقابات والاستادات والملاعب وحتى فى البنوك وعلى شاشات الفضائيات. فهناك حملة تبرع لتشييد المتحف المصرى الكبير، وأخرى لدار الكتب والوثائق المصرية، وثالثة لإغاثة جامعة القاهرة، ورابعة لإنشاء مدارس جديدة، وأخرى لصالح ضحايا غزة.
وباختلاف الجهات التى تجمع التبرعات والجهات والأشخاص الذين تذهب إليهم، يبدو أن «التبرعات» أصبحت حلا لمداراة فشل المؤسسات الحكومية، وتحول التبرع إلى نوع من النشاط اليومى، هناك من يطالبك بالتبرع لبناء مسجد وآخر لمساعدة الشباب على الزواج وثالث لبناء منازل آيلة للسقوط. ومؤخراً أعلن رجل أعمال شهير عن تخصيص ثلث أرباحه كوقف سنوى للإنفاق على جمعية خيرية تحمل اسمه، ورغم المبادرة المفاجئة فإن ظلال «الشو» ظلت تدور حول المشهد غير المعتاد.
تفتح «المصرى اليوم» هذا الملف لتجيب عن مجموعة من الأسئلة الشائكة: هل تذهب تلك التبرعات لأصحابها؟ هل أصبح على المواطنين أن يعوضوا من جيوبهم وعبر حملات التبرعات فشل الحكومة فى إدارة موارد البلاد؟ هل أصبحت المحروسة دولة تعيش على «فعل الخير»؟
أحمد بدوى «40 سنة» تاه فى دنيا التبرعات، خبرات قليلة أكسبته الشك فى جهات التبرع ووصول أمواله لمن يحتاجونها فعلا «أنا مش شايف إن التبرعات بتوصل للمحتاجين، مثلا معظم التبرعات اللى بتروح للمستشفيات والمعاهد الطبية بتروح للتجديدات أو البناء، ومش بيستغلوها لتطوير الأجهزة الطبية وزيادة العلاج، يعنى هيكون لازمة الفلوس إيه لما نروح نغير السيراميك ونركب رخام، ونعمل مبنى فخم وجميل، يعنى مثلا الصندوق الاجتماعى للتنمية، بيدعم المشروعات الصغيرة بملاليم، ومبانيه ضخمة، وتصميمها فاخر، وفى أماكن راقية جدا».
تشارك أحمد خبراته السيئة سارة على (34 سنة): «آخر مرة اتبرعت فيها كانت من سنين، وكانت لحساب مستشفى سرطان الأطفال 57357، ومن وقتها قررت إنى مش هاتبرع تانى، الموضوع زاد عن حده أوى، يعنى كان إيه لازمة المبنى الفخم اللى بنوه ده المستشفى بقاله أكتر من 10 سنين، ولسه بيستكمل، حملات التبرع دى دلوقتى بقت كتير جدا، وبتعمل نوع من التشتيت ومالهاش مصداقية، خصوصا أنها إعلانات مدفوعة الأجر، وموضوع التبرعات لجامعة القاهرة ده كلام مستفز جدا».
أما آية رفعت (22 سنة) فتقول: «كل سنة خلال شهر رمضان بنطلع تبرعات العيلة لجهة معينة، ممكن تكون مستشفى أو جمعية خيرية أو حتى فى حساب المحتاجين فى البنك، وده دور اجتماعى وإنسانى، صحيح إن الثقة ساعات مش بتكون 100% لكن بنعمل اللى علينا وخلاص، ممكن يكون فيه نصب فى حملات التبرع، لكن لما أشوف الحكومة عاوزة تبرعات تبقى مصيبة، إحنا مش عارفين الحكومة دى بتودى الفلوس فين.. كل شوية يقولوا مافيش فلوس للمدارس وللجامعات ولضحايا السيول ومرضى السرطان وغيرهم.. الدولة لازم تقوم بدورها والحكومة بتستعبط ولازم تبطل استعباط».
«لو هانرمى كل حاجة على الحكومة مش هانخلص» هكذا تعبر مارى منصور (23 سنة) عن مشاركتها فى الحملات «لو هاتبرع لمؤسسة أو هيئة مثلا هاتعود علىّ بفايدة أكيد هاتبرع، وأنا مع فكرة التبرع بشكل عام خصوصا لجمعية رسالة اللى انا باثق فيها، لكن لو حملة التبرعات دى مثلا بقيادة رجل أعمال أو شخص عنده القدرة على حل المشكلة أصلا مش هاشارك، دا بيبقى شو وشغل تلميع.. لكن جامعة القاهرة لما تطلب تبرعات طبعا أتبرع مش معقول نسيب الجامعة كده وكل حاجة نرميها على الحكومة».
أما سلمى عبدالسلام 26 سنة فقالت: «أنا حرمت أتبرع من فترة، كنت باتبرع لجمعية خيرية وبكفل طفل يتيم فيها، بس اكتشفت إن الولد ده بيصرف عليه أكتر من 5 غيرى، فى صورة كفالة برضه، والولد كل يوم بياكل فى مطعم شكل مع الإخوة اللى بيكفلوه، بس أنا ممكن أتبرع لصالح مركز القلب بتاع الدكتور مجدى يعقوب، ده راجل ثقة».
ورغم عدم إعلان د. مجدى يعقوب جراح القلب المصرى الشهير عن حملة تبرعات لصالح مركز يحمل اسمه لعلاج مرضى القلب إلا أن مواطنين عديدين أبدوا استعدادهم للتبرع ومساعدة المركز، منهم أمير على (22 سنة) الطالب فى كلية الطب «ممكن فعلا أتبرع لمركز مجدى يعقوب، اعتقد انه الوحيد اللى يقدر يحافظ على الملايين اللى هتروح من تبرعات المصريين لصالح المركز».