الخشخاش.. والطشت

يعنى خلاص؟؟.. لوى بوز بقرفة.. خلاص يعنى؟؟.. لوى بوز بقرفتين.. خلاص خالص يعنى.. كورت يدى استعداداً للكمة فى أنفه.. ماهو كل مايلوى بوزه مناخيره تنفش.. فبتغيظنى.. خلاص إيه يابنى؟؟.. إيه هو اللى خلاص.. جاك حمى ف باطاطك.. اشمئز منى مووت بقى.. خلاص يعنى؟؟.. خلصت همومنا والدنيا اتستفت والعدل استتب عشان تقعدوا تلطموا عالبتاعة الخشخاش دى؟؟.. إيه يعنى لوحة اتسرقت؟؟.. تيجى إيه فى اللى اتسرق مننا ولاَّ إنتوا يابتوع الفن انتوا ماتصدقوا تلطموا على أى حاجة والسلام؟؟.. قلتله انت عارف إيه الخشخاش دى؟؟.. إيه هو الخشخاش أصلا.. ابتدى يحرج وقال أنا عارف.. أهه حاجة م الخشاف أو الخرشوف.. قلتله بمناسبة رمضان يعنى؟؟.. قروانة دماغك محشية طبيخ وأكل برضه؟؟.. لأ يا سيدى.. الخشخاش ده نبات حولى طويل كده يوصل طوله أحيانا لمعدة سيادتك اللى شقيان عليها دى.. نبات بينتج أزهار متعددة الألوان من أبيض لقرمزى لبنفسجى لأرجوانى.. وورقته خضرا ليها عنق فضى اللون.. وهو من عيلة نباتات شقائق النعمان.. شىء طول عمره بيغرى الرسامين إنهم يرسموه من كتر ما ربنا بدع فى شكله.. ماهو ربنا اللى بدع الفن أصلا..
اتعدل عالكنبة زى النفسة اللى لسه والدة عيل براس كبيرة.. طب وإيه فايدته؟؟.. بيستخرجوا من نبتته الأفيون والمورفين والهيروين.. راح معووج عوجة ناظر المدرسة اللى قفش العيال بتضرب جوينت فى الكنيف.. آه طبعا.. عشان كده محموقة قوى.. فنانة بقى وبتاعة هيروين وأفيون.. قلتله إتليس بس واسمع وانت عامل زى الطشت كده.. المواد دى بيستخرجوا منها عقاقير طبية كتيرة غير المزاج ومش ده موضوعنا.. قاللى إزاى؟؟.. ماهو ده موضوعنا.. اتسرقت عشان فيها أفيون وحشيش.. تجارة مخدرات يعنى.. طبعاً لازم تتسرق.. حشيش فى وضح النهار كده ومتعلق عالحيطة فى متحف ملك الدولة.. وإزاى مباحث المخدرات تسيبه كده.. فين أجهزة الدولة.. فين الرقابة الإدارية؟؟.. واللى سرقها ده لفها ف سجاير ولاَّ حطها عالجوزة.. وما جابش حتة ليه؟؟.. ده حتى الحشيش شاحح اليومين دول.. أما نتن قوى..
طب أعمل فيه إيه ده؟؟.. غبى غباوة دبان الصيف.. وبعدين ما تتسرق ولاَّ تولع.. إذا كانت أراضى الدولة اتسرقت.. والقمح أبصر إيه.. وآدى الغاز بيرجعوه تانى بعد ما صدروه بسبع أضعاف تمنه.. ولسه حايفردلى الليستة ويصوت عليها.. رحت أنا كمان لوياله بوزى.. وهى يعنى اللوحة دى مش ثروة قومية؟؟.. دانت رخم رخامة.. مالها اللوحة؟؟.. دى رسمها فان جوخ اللى مازال يعتبر لحد دلوقتى من أشهر الفنانين للمدرسة الما بعد الانطباعية.. ولوحاته مازالت تقدر بأغلى الأثمان.. ولعلمك دى تانى مرة تتسرق.. اتسرقت مرة قبل كده سنة 78 ورجعوها.. صحيح قصة رجوعها تشوبها الشوائب.. قاللى ليه.. تشوبها الشوائب يعنى حشيش مخلوط بملوخية.. ياعم انت الصيام عامل حفرة فى نافوخك ليه؟؟.. تشوبها الشوائب عشان قعدت مسروقة سنتين.. وبعدين ناس بلغوا إنهم لقوها واقعة عالأرض باين فى الكويت.. واتقبض على تلاتة لكن مانعرفش اتحاكموا ولاَّ لأ.. وان كنا دفعنا فدية لاسترجاعها ولاَّ لأ.. ولا حتى عارفين إن كانت حقيقية ولاَّ مزيفة.. حاكم اللوحة دى منسوخ منها آلاف النسخ طبق الأصل.. واحنا بعافية شوية فى الكشف على الحقيقى م المزور.. لسه بنبص بالعدسة اللى كان بيومى أفندى بيصلح بيها الساعات..
قاللى يعنى الحرامية مستقصدينها بقى.. سايبين كل اللوحات والبلاوى اللى حاطينها فى المتاحف دى ومستقصدين دى؟؟.. قلتله شفت المصيبة بقى؟؟ مش ناخد بالنا؟؟.. مش نحرص؟؟
مش نتعظ إن المرة اللى فاتت الدنيا طنطنت واتفضحنا فضيحة المتطاهر عشان اتسرقت.. لأ نجيبها ونحطها فى المكان اللى أرجو إنها ماتكونش اتسرقت منه المرة الأولى وماناخدش احتياطاتنا فى الكاميرات وأجراس الإنذار والحرس اللى بيناموا على روحهم دول بس أهم منظر برضه؟؟.. لأ.. نصمم إننا لتانى مرة ننفضح فضيحة المتطاهر.. مع إنى كنت فاكرة إن المتطاهر ده بيتفضح فضيحة واحدة بس.. لكن احنا بقى.. كل القواعد مكسورة عندنا.. النفر عندنا ممكن يتطاهر مرات متعددة.. مالتى طهور.. ما علينا..
اللوحة دى حاليا بيقدر تمنها ب55 مليون دولار ياللى مش عاجبك ومستهتر بقيمتها قوى كده.. وأنا حتى شاكة فى الرقم.. لأنها قدرت قبل كده ب42 مليون من 22 سنة.. ولكن ماشى.. شغال يعنى.. ويا عالم حانعرف نجيبها تانى ولاَّ لأ.. جوايا بيقول أنهو الأصح.. نجيبها عشان تتسرق تالت ولاَّ نسيبها مطرح ما حاياخدوها لأنهم حايحافظوا عليها أكتر؟؟.. افتح عالنت ودور على متحف فان جوخ نفسه.. شوف اللوحات معروضة ازاى ومفهرسة ومنمقة ومحمية إزاى..
إنت عارف ياللى قاعد معووج انت متحف محمد محمود خليل ده كان بيته.. وهو اللى أوصى أنه بعد وفاته يتحول لمتحف يحمل اسمه هو وحرمه وتحصل الدولة على مقتنياته.. يعنى لو كان باعها لبلاد بره واتبرع بتمنها كان أبرك.. عارف فيه كام لوحة؟؟.. 304 لوحة ل143 فنان عالمى.. منهم خمس لوحات أصلية لرينوار.. اقعد اتنطط بقى وقوللى مين رينوار.. عارف قيمة اللوحات دى كام؟؟.. سبعة مليار جنيه.. شفت بقى المربع الصغير ده من أرض مصر يحتوى على كنوز ثقافية شكلها إيه؟؟.. ممكن تتخيل باقى كنوزنا اللى أمثالك الجهلة بيحاولوا يطمسوها حجمها إيه؟؟
كل شبر من أرض مصر ثروة فى حد ذاته.. بما تملك من حضارة تخصها وكنوز اقتنتها.. لو كل المصريين يؤمنوا بكده.. لو يشعروا بقيمة هذا البلد.. لو نستطيع أن نعيد إليهم وعيهم الذى طمسته الهجمات البربرية ودعاوى التخلى عن مصريتهم وهويتهم.. كان العسكرى فى المتحف شعر بقيمة موقعه.. كان المسؤول عن أى متحف حصنه وحماه وأمنه بدون توجيه من أحد ولا حتى دعم م الحكومة.. اللى سرق اللوحة دخل واتمشى بمنتهى اللطافة وسلكها من بروازها ولفها تحت باطه وخرج.. واللى قعد يخطط للسرقة فى بلاد بره كان بيلعب سيجا.. تلاقيهم لما جابوه يرسم الخطة وقع م الضحك.. وقاللهم ياعم انت عاوز أى حاجة من بر مصر.. ما عليك إلا إنك تدخل تاخده وتخرج.. شىء يوجع القلب..
الطشت اللى قدامى سكت وسنح واتكتم.. الظاهر إن مصر صعبت عليه.
كلاكيت تانى مرة.. وحيد حامد.. محمد يس.. يا يعيش..
إلى القائمين على مسلسل العار.. انتوا بتتكلموا جد يا ولاد؟؟؟؟؟؟؟؟؟؟؟
zahqanin@gmail.com