دليل الأمان في شوارع مصر (من واقع كوميديا القبض والتشهير!!)

بما أننا في أيام خاصة شعارها الحرب على الإرهاب وأدواتها متنوعة ومنها نشر الكراهية ووسائلها كثيرة ومنها الإعلام لدرجة أن الأخبار ممكن تصنف تحت بند الكوميديا السوداء.
ولأن العام بدأ باتهامات خطيرة ضد "أبلة فاهيتا" وتطوّر لاعتقال طالب بسبب كتاب، وطالبة بسبب دبوس، علينا أن نتوقف أمام ما يجب تجنبه ومراعاته من أجل الأمن والأمان فى بداية العام.
1. أن يكون معك رواية محل شبهة مثل رواية جورج أرويل 1984 التي انتشرت بعد اعتقال شاب كان يحملها لأنه تصور أن مصر 2014 تختلف عن لندن 1984!! نفس الرواية ممكن تسبب مشاكل جديدة، لكن وجود كتاب جديد اسمه غريب ومش مفهوم يزود الشك والمشاكل بسهولة.
2. مهم جدا تاخذ بالك من الغلاف والرسومات والشعارات والألوان اللى عليه لأنها ممكن تثير الاشتباه، وخصوصا إن كانت بلغة أجنبية.
3. يفضل تجنب الكتب وأن كنت بتحب تقرأ فى السكة ممكن يكون معاك مجلة أطفال بشرط أنك تستبعد أى مجلة علي غلافها أبلة فاهيتا أو أى كلمة من كلماتها بعد ما بقت رمز إجرامى يتآمر على الأمن والاستقرار وتخطط لأعمال إرهابية عن طريق الشفرات السرية من أول خطوط التليفون منتهية الصلاحية للكلاب البوليسية.
4. تجنب شرائط الكاسيت أو الاسطوانات المرتبطة بأغانى ثورة يناير.. وتجنب الناس محل الشبهة زي حمزة نمرة، وان كان ضرورى تسمع حد عندك قائمة مختصرة للاسماء والاغنيات المقبولة سهل توصل لها عن طريق مواقع الانترنت المؤيدة.
5. إياك أن تحمل صورة حد مغضوب عليه، وهو فى تعريف المرحلة أى شخص بيعارض أو بيطرح أسئلة حتي أن كانت منطقية لأن المنطق مات نتيجة ضربة حادة على الرأس زى ما سعيد صالح قالنا من زمان فى مدرسة المشاغبين. وللأمان أبعد عن خالد أبو النجا وأي حد يكون متعاطف معاه.
6. وأنت خارج ضرورى تتأكد من لبسك وأنه خالى من الأصفر والأسود. لأن الأسود أن زاد عن حده ممكن ينقلب ضده ويحول حياتك سوداء ويصنفك مع البلاك بلوك. والأصفر ممكن يصنفك مع رابعة وساعتها التهم الجاهزة كثير من أول المشاركة فى أعمال إرهابية للتعاطف مع ودعم جماعة إرهابية. ويمكن يكون من الأفضل تجنب الألوان الصريحة لأن قائمة الألوان المغضوب عليها ممكن تتطور قبل ما تعرف وساعتها تلاقى نفسك لابس فى تهمة جديدة. ولأن المثل الشعبى بيقول ألبس اللى يعجب الناس ، يبقى طبيعى تلبس ألوان مشكلة لزوم إعجاب أكبر قدر من الناس ولزوم الإرباك التكتيكى والأمان الإستراتيجى.
7. تحدى كبير أنك تركب مواصلة مع حد وتتكلم كلام بلغة غير معروفة.. وده وارد أن حبيت تتمنظر وتقلد اسماعيل يسين أو عادل امام وتستخدم أى كلام على انه لغة. والخطر يزيد أن كنت مع حد أجنبي. ساعتها تبدأ جهود كل مواطن شريف فى المساعدة والإبلاغ والقبض باعتبارك خطر يهدد الأمن القومى.
8. أن كان فيه احتمال للحركة ومعاك كتاب مصدر شك أو صوت الأغانى المغضوب عليها عالى وحد سمعه حتى فى سيارتك الخاصة أو فى البلكونه فالخطر موجود.. احساسك بالأمان لازم يكون هش وضعيف وتكون دائما خائف من وجود حد قريب بيتابع الإعلام وبيصدق كلام بيتكرر طول الوقت عن المؤامرة والخيانة ودليل معرفة الخائن وهو دليل اتطور كثير فى زمن الثورة من كنتاكى لجبنة نستو لكلمة أو كتاب وشعار على مسطرة وبالونة.
9. فى حالة وصولك بخير وسلام لمكانك المنشود الخطر دائما موجود، وأنت وحظك ممكن تلبس تهمة عمالة أو خيانة أو شذوذ أو الحاد وكلها حاجات -وفقا للإعلام- تقدر تحكم عليها بالحواس المباشرة. فالسمع يعرفك العميل من لغته، والنظر يكسفه من الكتب اللى معاه، أما الاحساس فيخليك تعرف الشاذ والملحد!! والقائمة بتتطور وعليك تتابع كل جديد.
10. يفضل الابتعاد عن الحمامات العامة والمقاهى الشعبية والبحث عن الكاميرات الخفية والعلنية، وتسجيل كل تحركاتك ومقابلاتك على طريقة عادل أمام فى "شاهد ما شافش حاجة" وساعتها يمكن السجل المتين يكون دليل ينفع فى التحقيق، بس غياب قيمته فى المحاكمة الإعلامية يخليك تبتعد عن التواجد فى الأماكن العامة وكل ما يمكن ان يتحول إلي اتهام إعلامى بدون رقيب.
11. فى تعاملك مع مواقع التواصل الاجتماعي عليك تجنبها أو أنك تراقب نفسك قبل ما حد يراقبك. ممكن تتابع صفحات حقوق الانسان بره مصر، وتنتقد براحتك الانتهاكات الأمريكية والمنظمات الحقوقية الدولية. شارك بالأغانى المقبولة وأبعد عن المرفوضة، وبصور الأطفال والأكلات وأبعد عن الكتب والأخبار... ساعتها يمكن تكون فى أمان بس المهم تاخد بالك من الاخبار اللى ممكن حد يشاركها على صفحتك ومحتاج تعلن اعتراضك عليها أو تلغيها لأنها تهمة وممكن تتفهم موافقة على اللى فيها.
12. لازم تفكر نفسك أننا فى دولة بتحارب الرذيلة وأن كانت ترحب بالفيديوهات المسربة بعد تسريبها وفضح صاحبها فيرتفع الطلب وتزداد نسبة المشاهدة. وما تشغلش بالك بالتناقض بين الاستنكار والرفض وارتفاع نسبة المشاهدة والتحرش لأنه بيؤكد على التميز وبيسجل اسم مصر فى التقارير والتغطيات الدولية وكلها شهرة مجانية لزوم السياحة العبثية.
بعد تجنب كل ما فات، يمكن تقدر تتنفس بس ساعتها محتاج تأخذ بالك من التلوث والدخان والقش الأسود والكره الأسود وتدخل السنة الجديدة برجلك اليمين ومعاك فى أيدك شوية بخور لزوم الجن والسحر والاعمال.
يجعل كلامنا خفيف.
عبير ياسين
عبير ياسين