جزمتك (لا مؤاخذة) جلد بنى آدميين

أن تعيش تجربة شراء حذاء رياضى مع واحد من أولادك تكتشف بعدها أن هناك الكثير من الأشياء العجيبة فى هذه الدنيا (ومصر دايما أم الدنيا ) و تشوف حاجات و تعرف محتاجات ... وخاصة اذا باغتتك ابنتك وفاجأتك بأنه لا بد و حتما و لزاما على وجه السرعة شد الرحال الى أحد مولات قاهرة المعز لأختيار الحذاء الهمام !!!
ومالها يا بنتى محلات الأقاليم حوالين البيت و قريبة .... لكن مسكتنا من ايدينا اللى بتوجعنا فهى مغادرة الى مؤتمر عالمى للمشاركة فيه و المؤتمر اللى هيقعد يومين بقالهم 6 شهور معاها على النت و الأيميل بيشرحوا لها كل صغيرة وكبيرة ( عالم فاضية ) ونظرا لأختلاف الجو فى قارتهم عن قارتنا قالوا لها بدقة درجات الحرارة و الطقس و ضرورة وجود معطف المطر و الشمسية و الجوانتى و الحذاء الرياضى لأنه على هامش المؤتمر ستكون هناك زيارات سيرا على الأقدام .
طيب يا بنتى ما الدولاب بتاعك مليان أحذية .... أبدا وحتما و لابد من حذاء رياضى ماركة ... كمان ماركة و بعد المناقشات والمداولات انتهى الأمر بشد الرحال والوصول للمول بتاع الماركات و يا هنانا وسعدنا اللوحات الحمراء تعلن عن تخفيضات لا مثيل لها تصل الى قريب من الميه فى المية وده مجموع كبير يدخلك أى كلية قصدى مش بس تقدر تشترى به جزمة لا دستة جزم . يالا يا بنتى اشتري لك شوية.
استخارى واختارى ها المقاس حلو يالا حركى صباعك مريح تمام و مقاسك تمام وماركة كمان ياللا على الدفع ...كام يا همام ألف و200 بالتمام و الكمال !!!! مين يا عم !!! أنت غلطان احنا جايين من الأقاليم على سيرة التخفيض قرب ال 80 فى الميه . ... أيوه يا فندم ما هو ده بعد الخصم و لكم هدية شراب كمان.
يعنى متأكد أن ده من اللي عليه التخفيضات .... أيوه متأكد تمام ... طب شوف لنا بأه اللى هترموه ومالكمش به أى اهتمام.
لفينا السبع لفات وشوفنا جميع الماركات و فى لحظة لمحنا تخفيضات فوق التخفيضات جرينا على المحلات و قالت لنا أحرجتونى تمام اشتروا ليا جزمة و السلام . و قلت مش لو كنا من المشاهير كان حد حدفنا بأى جزمة و السلام . خلاص دا آخر مكان وهنشترى منه مهما كان.
وكانت صفقة العمر حذاء ماركة و تخفيض فوق تخفيض ها ياعم بكام ؟؟ مية يا سلام اشجينا ياعم بالكلام... ماما ..ماما بيقول 800 ..صحيح يا بنى 800 !!!! أيوه وعليهم بوسه كمان .لأه بأه يابنى اعذرنى أنتوا حرامية !!! يالا بينا مش مهم الجزمة ديا . بصيت لقيت الدمعة بتفر من عين البنية !! فى الحقيقة صعبت عليا . كل ده علشان جزمة!!!!! آمال يا بنتى لو هنشترى فستان كمان ؟؟؟
افتكرت جار لنا من عمرنا من يجى كام و عشرين سنة استجمع شجاعته وقال لأبوه الحاج يا با نفسي فى جزمة ماركة قاله عينى يابنى عاوز كام أأمر من جنيه ل 50 كمان . قاله بصوت واطى عاوز 50 و 50 واثنين 50 من غير كلام !! قاله ياااااه ده الجزم فى مصر يا جدعان بقالها شان !!!! مصنوعة من جلد اييييه دى كمااان ؟؟؟؟ من لخبطة الواد قال له من لحمى و لحمك باين عليها جلد بنى آدميين عظام .
تخفيضات وهمية
تخفيضات وهمية