مصر هى .. مرات ابويا

ايه اديتنا مصر . من ساعة ماربنا خلقنا. لغاية.. ما يسترد وديعته .. بمشيئته وحده ، ما تقوليش .. مصر هى امى . ومصر كيت وكيت ، وان اللى ما اتولدش فى مصر .. ما شاف . ولا حيشوف ، مصر هى امك . انت حر فى اختياراتك ، بس وحياة ابوك . بلاش كلام انشا . ولا اغانى . ولا حتى . طق حنك . زى امى اللى بجد . وامك . ما كانوا بيقولوا
عاوز الحق .. من بنى ادم مصرى . داخل على عقده الخامس .. حا قولك ، من ساعة ما ربنا خلقه . فوق الارض دى . وهو بيعانى . وغلبان . طهقان . مسكين . غلبان . وطالع من هدومه. ان كان .. عنده هدوم بجد.. زى بقية خلق الله ، اللى على وجه البسيطة
خد عندك يا امور ، من ساعة ما تولدت .. اى والله ، وان كنت با اكدب . يسلطوا عليا . اخوانا البعدا اياهم ، كانوا بيقولوا لينا : اربطوا الحزام .. مصر ان شاء الله . حتبقى ام الدنيا وهى كده فعلا .. بس انتوا. مش واخدين بالكم ، ازاى يا عم . هو احنا لا مؤاخذة .. هنود
وكان بيقولك كمان .. ال ايه. احنا فى عنق الازازة وان شاء الله . وبشوية ارادة . وضرايب ، حنخرج من العنق . وننطلق ، وصدقنا كلامهم ، و.. ولا خرجنا. و.. ولا انطلقنا ، وفضلنا من يومها . محبوسين فى الازازة ، فشر .. عفريت الف ليلة وليلة . والمصباح السحرى
والغريب .. ان التاريخ ما بيكررش نفسه .. فى كل العالم الا. فى مصر ، اللى الفقرا فيها دايما. بيدفعوا التمن .. وبالغالى
واللى الاغنيا . بيزيدوا فيها .. غنى . والفقرا. بيزيدوا .. هم ما يتلم وكله على ودنه
عاوز اقولك ايه . ولا ايه
احكيلك عن .. المية الملوثة . ولاعن الاكل المرشوش بكيماوى . ولاعن التعليم اللى ما يعلم بيه.. الا ربنا. ولا.. عن الطرق . والناس اللى مش طايقة نفسها. ولا اضحك عليك. وعلى نفسى
واقولك مصر ام الدنيا. والاخرة كمان
مبسوط يا عم .. ومعيش نفسك . فى الطراوة اللى عودوك عليها .. مبسوط يا عم .. وواهم نفسك. بان مصر .. هى امك بالرغم من البهدلة. و قلة القيمة. اللى بتشوفها.. كل لحظة فيها من مواصلات. وناس زيى. وزيك . لا بيراعوا حق ولا.. ضمير. ولا جيرة
مبسوط يا عم .. وانت مواطن .. من الدرجة العاشرة ، ومترشح تاخد.. ال11 كمان
قول عليا مجنون .. قول عليا.. ناكر للجميل ، قول عليا .. اللى تقوله بس استفت قلبك وبص للناس .. فى العالم من حواليك وقارن حالك . بحالهم
بس ما تقوليش .. اصبر
ولا .. شد الحزام
ولا.. ادفع
وحياة ابوك .