وليه نضحى بجيل ولا اتنين .. لما ممكن نضحى بالشعب كله ؟

والله كلمتين ورد غطاهم. للى بيقولك مستعدين نضحى بجيل ولا اتنين. عشان الاجيال اللى جاية تعيش. كويس .. احنا معاك يا عمنا وكلامك فى العين. قبل ما يكون فوق الراس. ومستعدين برده نروح اشغالنا موتو رجل. ونستغنى عن المواصلات العامة والخاصة. وبلاش وجع دماغ. وجيب كمان. وحنوفر للبلد المليارات. اللى بتروح علينا من البنزين والسولار.
ومستعدين كمان يا عمنا اننا ناكل طقة. ونجوع طقتين. عشان نوفر مليارات تانية.. بتروح على شرا القمح .من اللى يسوى. واللى ما يسواش. ومستعدين برده يا عمنا. نخفض مرتباتنا. ولا نتبرع بمرتب شهر كل كام شهر. وبكده نمنع طبع البنكنوت على الفاضى والمليان فى البنك المركزى. ونقلل التضخم. والاسعار تبقى اقل من النص.
ومستعدين ننام بدرى . الساعة 8 كويس يا عمنا.. ولا تامر بميعاد تانى؟ ومستعدين نصحى الساعة 5 الصبح كمان. مبسوط يا عمنا. ونبدا يومنا بالدعا. ويا فتاح يا عليم يا رزاق يا كريم. ومستعدين نمنع الوقفات. والا حتجاجات. والا عتصامات.. ونقول على اللى حيعملوا كده: ناس وحشين. ومش مننا. و نحاربهم كمان. ونطردهم من نعمة رضاك .. مبسوط يا عمنا.
ومستعدين كمان. فوق كل ده وده وده.. اننا نحدد النسل. واللى يخلف اكتر من اتنين. نحرمه من الدعم. ومستعدين كمان.. ناخر سن الجواز. ونخليه عند الاربعين. ونكره الرجالة فى مسالة:المثنى والثلاث والرباع.. فى الجواز. وكفاية على كل واحد.. واحدة. وربنا يصبره عليها. والا يطلق ويخلص. ولا حتى يخلع.
ومستعدين يا عمنا.. نعمل صندوق ادخار لصالح الدولة: ابونا وامنا وامننا. ومستعدين نعمل اد اللى قلته لك الف مرة. بس انت كمان يا عمنا. مستعد زينا على ايه؟ تعالى اما اقولك على راى عبد المقصود افندى. وزير اعلام الجماعة الله ما يرجعها. ولا يرجعه. انت كمان يا عمنا. عندك استعداد زينا. تروح كل يوم وزارتك موتو رجل. وتتخلى عن موكبك والهيلمان . و تاكل برده زينا طقة. وتستغنى عن طقتين. وتمنع الولايم والعزايم هنا وهناك. و تتبرع بمرتب شهر.. كل كام شهر. وتاكل رغيف العيش ..ابو 5 صاغ وتشرب مية الحنفية. وووووو.. حاجات كتير ممكن تعملها.
مش انت بس. ومعاك كمان الاكابر بتوع البلد. اللى مش عارفين حالها امتى حينصلح. وطول عمرنا.. ومن ساعة ما ربنا خلقنا فوق ترابها.نسمع كلام وحديت. عن عنق الازازة. وشد الحزام. وال ايه: التقشف. وطول عمرنا برده فى البلد دى. بنسمع. ونشوف عن الاغنيا. اللى بيزيدوا غنى. والفقرا اللى بيزيدوا فقر. عاوز تضحية.. ما تسالش الفقرا. ولا الناس الغلابة وولادهم.. اللى اتخلقوا مضحيين. وكانه كان مقسوم على الجبين. ولا زم تشوفه العين. واحمدوا ربنا.. ان انتوا لسه عايشين؟
عاوز تضحى.. ابدا بنفسك يا عمنا. انت واللى حواليك واعطونا المثل .. مش اسمع كلامك يعجبنى.. واشوف افعالك استعجب؟ ابدا بنفسك. ومعاك اخوانا الوزرا. واعطوا المثل. وضحوا عشانا. وعشان ولا دنا. ولو مرة واحدة يا عمنا ؟