"عزيزة" تتبرأ من مبارك على"الفيس بوك"

تبرأت عزيزة من الرئيس المخلوع مبارك على "الفيس بوك" بعدما اختتم تعقيبه على حديث النيابة في محكمة الجنايات أمس ببيت شعر: "بلادي وإن جارت عليّ عزيزة وأهلى وإن ضنوا عليّ كرام" حيث انهالت التعليقات الساخرة من النشطاء وكان أبرزها إعلان "عزيزة" لبراءتها الكاملة من المخلوع وفيما يلى أطرف التعليقات:
- "أنا عزيزة وبقولها بعلو صوتي وفي قلب ميدان التحرير.. أشهدوا ياخلق.. أنا "متبرية" من الراجل دا ليوم الدين".
- "حتى عزيزة اتبرت منه.. طول عمرهم مش مقدرين قيمتك يا ريس".
- "مين عزيزة دي.. اللي ماتت في قطر الصعيد ولا فى العبارة ولا مسرح بني سويف ولا الدويقة؟".
- "كده برضه يا "عزيزة" مكانش العشم تغدري بالراجل وتجورى عليه بعد 30 سنة فحت وردم".
- "عزيزة دي قليلة أصل ومش متربية.. ترمي الراجل في شيبته إخص على "النسوان" الغدارة إخص".
- "مين عزيزة دي يا واد يا مرسي.. هو الريس بيعرف ستات من ورانا ولا إيه".
- "مكافأة 400 مليار دولار لأي حد يعرف أي معلومة عن الست "عزيزة" والدفع بشيك مقبول الدفع على بنك المخلوع".
- "مبارك بيقول: بلادي وإن جارت عليَّ عزيزة.. والعادلي بيقول: إن جاءكم فاسق بنبأ فتبينوا. إحنا آسفين يا ريس وحقك علينا يا عادلي".
- "إحنا شعب قلبه قاسي.. أوي أوي .. إحنا مش بنحس كدة وكدة".
- "يا عيني يا ضنايا، اللي خد منك الفيل قادر يرجعهولك".
- "بلادي وإن ضاقت عليا أديها لابني الصغير"جيمي" مع تحيات حسني مبارك".
- "يا واد يا وطني مع كامل الاعتذار للشيخ خالد عبد الله".
- "لا تغضب أيها النسر الجريح.. اللي بيعمل خير لوجه الله مش بيستنى جزاء من البني آدمين".
- "يا واد يا وطني.. الرئيس متحدثًا عن تل أبيب".