بلا ألوان أنا اللي بضحك طوب الأرض يقولوا الناس لافارقة معاه طول ولاعرض وبرسم ع الوشوش فرحة تجلجل روحهم من الضحكة ........................... بتنطط وبتشقلب فتحسدني عيون الكون تروح حركاتي تمسح هم قلوب جاية تدور على النسيان بلخبط وشي بالألوان تتوه الدمعة في ضلوعي فترقص روحي م الأحزان ................................. ولما تخلص النمرة بلاقي الحزن مادد ايده بيمسح فرحة الوش اللي مش وشي فترجع صورتي زي زمان بلا ألوان .................................... أنا المسكين لا لاقي نظرة تواسيني ولا صدر يحميني من نظرة عيون قاسية ولا ايد ماسحة دموع العين اللي مش نازلة ...................................... وف ليلي بنام على روحي من همي وقدامي شريط العمر بيعدي لا فيه لحظة تفرحني ولا غنوة تصبرني ......................................... أنا المدبوح على البارد وأنا الشارد من الأحلام ورجليا بتجري فوق حبل مشدود على الألغام