مساحة قلبى

أنا بخير..
وزى الفل والريحان..
وقلبى اللى كبر فجأة قبل الأوان
لا بيعجّز..
ولا بيشيخ..
ولسه طفل
زى زمان..
بطعم الفرح
وريحة الأرض ساعة المطر
ورغم إنى ف قلب الخطر
أنا حاسس
بإن الدنيا لسه أمان
وإيه كمان..
ولو قربت منى يا حزن
ولو فكرت تئذينى..
منين ما بروح بلاقى حضن
قادر لسه يحمينى..
وأقلق ليه
وأنا أمى اللى كانت لما تدعيلى
تقولى روح..
ربنا ما يحوجك للعبد..
تعيش حر.. كما العصفور
ولا يدخل فى قلبك برد..
وأقلق ليه..
ولو تقفلها مية ونور
تبيع.. تخطف.. تشترى الدستور
ولو تكسر قلم واتنين
ولو تسرق رغيف العيش
ما عمرك يوم هتعرف فين
أنا شايل أغانى العشق
ولو تفهم ف دمع العين
كنت عرفت إن الألم
ما يكسرنيش..
ده بيقربنى من روحى
تروح انت..
وروحى تعيش..
وأقلق ليه..
مفيش ف القلب غير غنوة
كلام بيرم وصوت درويش
وعمرى ما اتوه
فى وسط قلوب
بعرفها وعرفانى..
ومهما تضيق..
مساحة قلبى أد الكون
ما دام النسمة وصلانى..
وأقلق ليه..
وأنا الخطوة اللى وخدانى
تقربنى..
ما تبعدنيش..