سعيد شحاتة يفوز بالمركز الأول في مسابقة ساقية الصاوي للعامية

منذ انطلاقها، تبحث "المشهد" عن أصوات أدبية واعدة، تدعمها وتدفعها للأمام، ولقد نشرنا الأسبوع الماضي قصيدة "ثورة نبي" للشاعر سعيد شحاتة.
وهاهو شحاتة يتوج بالمركز الأول في مسابقة شعراء العامية بساقية الصاوي، بعد منافسة شديدة مع العديد من الأصوات المصرية الواعدة في شعر العامية، حيث تقدم للمسابقة أكثر من مائة شاعر.
لجنة التحكيم التى تضم الشاعر الكبير ماجد يوسف والدكتور هيثم الحاج على، والشاعر مصباح المهدى، والدكتور عماد عبداللطيف، نوهت إلى شدة المنافسة وإلى تقارب أصوات العشرة المرشحين لنيل الجائزة، ألا إن سعيد شحاتة اقتنص المركز الأول عن جدارة.
وفي حوار سريع بعد تسلمه الجائزة قال الشاعر إنه: سعيد بهذا الفوز وبتلك المسابقة، لأنه يحترم رأي لجنة التحكيم والتى تضم كبار الشعراء والنقاد. سعيد يعترف أنه يعشق فؤاد حداد وصلاح جاهين وأحمد فؤاد نجم، ويحلم بأن يجمع الشعر الشعوب العربية من خلال الربيع العربي.
ونحن ننشر لسعيد شحاتة قصيدته الجميلة "العيد" من ديوانه "كلام أخضر"
العيد
العيد عدى
وعنيك يا ياسين لسه بتحلم
(ببهيه) وبحروب الردة
بالفرح اللى بيضحك للناس وقت الشدة
العيد عدى
وعنيك لسه بتحلم بالنور
بالورد المالي جيوب الدور
بالبنت "بدور"
اللى حبيبها اتعازم ووقف للدبابة
بسطور مليانة كلام كداب
تحت العناوين الكدابة
لسه بتحلم بالعنابة اللى بتطرح ورد
عنابة قلبك ياد يا ياسين نشفت م البرد
والأرض
ماهياش نفس الأرض الطراحة
لسه بتحلم وسط النعناع
بالبنت السمرا الفلاحة
بخدود التفاحة اللى بتفتح خط النار
بالبيت والغيط والزير والبير
والحلل الصاحية على الكوانير
في زوايا الدار
ببهانة اللى بتشطح في الزار
بهزار لولاد ساعة الفسحة؟
لسه بتحلم بالعيش
والخيش
والناف
والمنجل
والمسحة
بالكلمة
اللى هتبدأ تصحى ف صوتي وصوتك
بالحرب الدايرة عشان قوتي وعلشان قوتك
بالريح العمالة بتبدر موتك جوه اللجران
لحظة ما بتزرع فدان قلبك بالحنة؟
لسه بتسألني الجنة لمين؟
الجنة لأصحاب الجنة!!
والنار لولاد الكلب الدون!!
لو نفسك توصل يم هناك اعمل مجنون
اعمل درويش
البس زي الحرافيش بالظبط
ابدأ بالربط
ما بين وشك ووشوش الناس
اضحك غصبن عنك بشويش
للسكة ولكلاب الحراس
وان داس فوق راسك ديب خواف
خنّ وطاطي
واتمنى الموت على إيد ناسك
أحسن ما تموت يا ياسين في العيد
على إيد الواطي ابن الواطي