لابتوب تسعة ملى

بعد أن قبض عليه وهو واقفاً بجوار قسم شرطة مصر القديمة جداً، اصطحبه المخبر إلى داخل القسم، ودخل به إلى غرفة النباطشية، وعظم تعظيمته العظيمة للضابط العظيم الجالس خلف المكتب قائلاً:
المخبر: تمام يا فندم.. لقينا الواد ده واقف قدام القسم ومعاه المكنة دى
الضابط: ورينى كده
المخبر: اتفضل سعادتك
الضابط: الله الله.. لاب توب!! شايل لابتوب فى الشارع ؟!
هنا بدا على الشاب الدهشة وعدم الإدراك للحوار الذى يدور حوله ويبدو أنه يدور عنه.
سمع الشاب دوى قنبلة انفجرت تحت رأسه من الخلف فدفعته إلى الأمام حتى ارتطم فى مكتب.
المخبر: متجاوب على الباشا
الشاب: هو إيه السؤال؟!
الضابط: شايل اللابتوب ده ليه فى الشارع
الشاب: عشان هو اسمه "كمبيوتر محمول"
المخبر: مُرخص؟!
الشاب: مين.. أنا؟ّ!
المخبر: لأ الجهاز!
الشاب: أيوه عليه نسخة وندوز7 أصلية جاية معاه
الضابط: خليك معايا أنا.. بتعمل باللاب توب ده إيه فى الشارع
الشاب: يا باشا هو فيه قانون بيمنع؟!
2
الضابط: لأ.. فيه شرطة بتمنع.. إنت ماسمعتش عن خبر القبض على شاب بحوزته أيباد فى المترو من كام يوم؟
الشاب: سمعت
الضابط: ماسمعتش عن خبر القبض على شاب قاعد على القهوة وبحوزته لابتوب الأسبوع إللى فات؟
الشاب: لأ دى بسمعها كتير قوى ياباشا
الضابط: ولما انت سمعتها كتير.. ماشى باللاب توب فى الشارع ليه.. بتتحدانا ولا فاكر نفسك مين؟ّ!
الشاب: يا باشا هو حضرتك المخبر قبض عليا فين؟
المخبر: قدام القسم
الشاب: مهو أنا كنت جاى أسلم اللاب توب ده هنا فى القسم.. لأن الولد إللى كنتوا بتجروا وراه إمبارح فى الشارع اللى وراء القسم رمى شنطة اللابتوب عشان متقبضوش عليه متلبس.