«أحمد ماهر» يكتب من السجن: نعم للسيسي رئيسًا للجمهورية

كتب «أحمد ماهر» من السجن: نعم للسيسي رئيساً للجمهورية أه والله .. زي ما بقولك كده .. نعم للسيسي رئيساً للجمهورية .
أنا الموقع أدناه واللي إسمي أحمد ماهر , واللي بيقولوا عليا كل الإتهامات والأساطير اللي تم إختراعها أو لسه هيخترعوها بقول و أنا في كامل قواي العقلية نعم للسيسي رئيساً للجمهورية ، ومش نعم واحدة بس .. نعمين كمان . وليه لأ !!! هنلف وندور على بعض ؟!!! هو فعلاً رجل المرحلة .
ولكن أسبابي مختلفه عن كل اللي بيشجعوا السيسي وبيدفعوه للترشح , سواء فلول أو كنبة أو أحزاب , ونخبة فاشلة عمرها ما هتعمل حاجة وعمرها ما هتقبل غير الفتات من العسكر والفلول وعمرها ماهتقدر تنافس حد ، خلي الناس تشوف بعنيها وتجرب بنفسها .. خلينا نخلص .
الناس جربت الإخوان وشافت الغباء والعناد والكذب , خليهم يجربوا حكم العسكر هو و الفلول للسلطة . مع إن أساسا حكم العسكر لم بنتهي يوماً واحداً منذ 26 يوليو 1952 ، حتى بعد التغيرات اللي حصلت بعد هزيمة 67 اللي حصلت بسبب إستبداد العسكر و إلتفاتهم للملذات الشخصية والنزوات ، وبعدها بدأ يبقى العسكر أقل ظهورا و أقل فجاحة في الإنحراف والبحث عن الملذات , و رغم عهد السادات اللي خلع البدلة العسكرية ولبس البدلة الملكي أو المدني , ولكن برضه فضلوا مسيطرين على كل شئ من خلف الستار .
و كذلك في عهد مبارك ,, رجال الأعمال و العصابة ماسكين البلد , لكن ليهم حدود محدش يقدر منهم يقرب جنب إمبراطورية العسكر و مزارعهم و مصانعهم و قصورهم و أراضيهم .
حتى في عهد مرسي "منه لله" محدش قدر يقرب من إمبراطورية العسكر و مصالحهم الخاصة وصفقاتهم السرية , وتحكمهم في الحنفيات الرئيسية . ف ليه يستمروا في الحكم من خلف الستار ؟!!! خليها فاشية عسكرية صريحة .. مش الناس عايزة كده ؟؟!!! خلااااص .. خليهم يجربوا الفاشية العسكرية الصريحة , و العقلية العسكرية في الحكم .. إلبس علشان نازلين .
خلينا نشوف حلول العسكر للمشاكل الإقتصادية و الإجتماعية , مع إننا شوفنا الطريقة خلال ال 60 سنة اللي فاتوا , بس خلي الناس تشوف تاني . خلي الكتاب و الصحفيين يشوفوا حرية الصحافة وحرية التعبير في عهد "السيسي" , و خلي كل صحفي منافق يحس بالجريمة اللي عملها ، و كل كاتب بيطبل دلوقتي للسيسي يعرف حدوده في فترة حكم السيسي ، أيوه بقى خلونا نرجع لأيام "ممتاز القط" و طشة الملوخية بتاعة زمان .
مش الأحزاب الليبرالية و اليسارية والقومية عايزين "السيسي" علشان ينقط عليهم شوية منح ومناصب ؟!! خليهم يأخدوا الصابونة و يشوفوا الفلول اللي هيطلعوا لهم لسانهم , أصل العسكر ملهومش غير الفلول .. والفلول ملهومش غير العسكر , وجت النخبة الحزينة تفرح مالاقيتلهاش مطرح .
ومش الأحزاب الناصريين عايزين "السيسي" يكرر تجربة "عبد الناصر" تاني ويشكمنا , ويرجع عهد الدولة الشاكمة اللي محدش فيها يعرف يفتح بوقه ؟!!! خليهم يشوفوا "السيسي" وإنحيازاته بنفسهم ، "السيسي" اللي إتدرب في أمريكا ومرتبه من أمريكا .. وميقدرش يعمل حاجة بدون التنسيق مع أمريكا و إذن من إسرائيل .
خلوهم يشوفوا بعنيهم السيسي هيعمل إيه في العمال والقطاع العام ومكتسبات عبد الناصر . خلي اللي كانوا حقوقيين يشوفوا حال حقوق الإنسان هيبقى عامل إزاي وقتها ، وخلي الناس تشوف تعامل الشرطة إزاي وقتها .
و بالمرة أفكركم بشوية حاجات . فاكرين يوم موقعة الجمل ؟؟!! يوم إعتقال عدة مجموعات في نفس وقت الهجوم على التحرير ، المجموعة اللي كانت بتزور البرادعي .. والمجموعة اللي كانت في المركز المصري ومركز هشام مبارك للقانون .
أكيد بعض الناس دول بيحاولوا ينسى أو يتناسى خصوصا إن منهم من يحاول إيجاد مكان بالقرب من السلطة . لكن اللي منسيش , ممكن يكلمنا عن اللي حصل معاهم إيه في مبنى المخابرات الحربية وهم متغميين ومتكلبشين إيد ورجل ؟!! فاكرين الضرب والتعذيب ؟؟!!! فاكرين صوت السيسي وتهديداته ؟!!! يا عملا يا خونة يابتوع كنتاكي والإينجليش لانجويش ؟؟!! فاكرين تغير موقف "السيسي" أثناء التحقيقات معاكم جوه لما عرف إن ملايين نزلت التحرير بعد موقعة الجمل ؟؟!! "السيسي" مدير المخابرات الحربية وقت مبارك و وقت طنطاوي , اللي أخد ملفات أمن الدولة وكمل شغلهم , و التنصت على التليفونات وقت الثورة وبعدها . فاكرين ؟؟!!! طب حد يقدر يفكر الناس باللي حصل جوه عند السيسي ؟؟!! .
طيب بلاش دي ... أسلوب المخابرات الحربية في إنتزاع الإعترافات ، المخابرات الحربية اللي كان ماسكها السيسي ، فاكرين 9 مارس 2011 و 8 ابريل 2011 وغيرها وغيرها من الحوادث اللي حصل فيها تعذيب وتحقيقات غير قانونية وإرهاب للنشطاء ؟؟!! فسسسس .. كله بينسى ؟!!!! .. لأ مش كله الحمد لله .
عموما خلونا نخلص , و زي ماشوفنا بعنينا مساوئ و كوارث حكم الإخوان , خلينا نشوف حكم العسكر الصريح بدل المستتر ، خلي الثورة تقوم على نضافة بعد حكم العسكر . خلونا نشوف بجد القمع والقتل والإعتقالات وشغل صلاح نصر بتاع زمان , خلونا نشوف عهد ناصري جديد ولكن بدون عدالة إجتماعية وبدون زعل إسرائيل , عبد الناصر السيسي 2014 اللي إتدرب في أمريكا و ميقدرش يزعل إسرائيل و بينسق معاهم قبل أي خطوه في سيناء . والجواب باين من عنوانة . و خير عموماً .. كده نخلص المعارك بدري بدري .. وبعد سنين نبني على نضيف , عرفنا الفاشية الدينية , و لازم الناس تشوف بعنيها الفاشية العسكرية و الفشل والإستبداد اللي هيوصل لإحتراب أهلي و إنهيار إقتصادي .
وبناء عليه : أقر أنا الموقع أدناه وأنا في كامل قواي العقلية تأييدي لترشيح "السيسي" لرئاسة الجمهورية . خلينا نلبس , نجرب , ونشتغل على نضيف بعد كده . أحمد ماهر ليمان طرة.