إحنا آسفين يا ريس

إحنا آسفين يا ريس
إحنا آسفين يا ريس.. آسفين علشان كنا فقراء ما عندناش حاجة نديهالك قصاد "خدماتك" لينا وللبلد، ما عندناش غير أرواحنا. خدها.. خدها يا ريس وعيش انت إحنا مش مهم نعيش، المهم انت تعيش
إحنا آسفين يا ريس.. آسفين علشان جهلنا حط غشاوة على عقولنا، خلانا ما نقدرش التضحيات اللي عملتها علشانا، خلانا ما نفهمش انك عارف مصلحتنا أكتر مننا. ومع ذلك كنت بتستحمل غباوتنا وجهلنا، وتاخدنا على قد عقولنا
إحنا آسفين يا ريس.. آسفين علشان نزلنا الشارع وعطلنا "عجلة الإنتاج"، العجلة اللي كنت طول عمرك "سايقها" ومعيشنا في أمان، آسفين كمان علشان خلصنا كل ذخيرة أسلحة الشرطة اللي بتحمينا وبتسهر على أمننا وأمانا، وكمان آسفين علشان "موتنا" في الشارع وغرقناه دم، وعطلنا حركة المرور
عارف يا ريس أكتر حاجة آسفين عليها إيه؟ آسفين إنهم حبسوك وخلوا بينك وبينا سجن ومحكمة وقاضي، كان نفسنا يا ريس - زي ما عودتنا دايماً - ما يبقاش فيه حواجز بينا وبينك، كان نفسنا نبقى جنبك وحواليك دلوقتي، شوف كنا هنعمل فيك إيه. كنا هنشيلك من على الأرض شيل يا ريس، كان زمانا دلوقتي بنلف بيك مصر كلها. مش كتير عليك يا ريس، انت عشت طول عمرك "تخدمنا" وجه الوقت اللي لازم نردلك فيه كل خدماتك.. كلها، كل حاجه عملتهالنا لازم نعملك زيها، وعلى قد ما اديت يا ريس.. على قد ما هتاخد