سوبر ماركت التعليم في الجمهورية بتاعتي!

كل سنة وانتو طيبين بمناسبة العام الدراسي الجديد، يااااااااااه فكرتوني بأيام ما كنت كده طفل very little 3 ابتدائي في مدرسة ابن خلدون المشتركة اللي في امبابة، طبعا دي مدرسة خرجت عظماء، أولهم كان العبد لله والدكتور مجدي يعقوب كنا قاعدين في تختة واحدة، بس هو ربنا فتح عليه وسافر بره وانا قعدت هنا، وكان بينا اهتمامات مشتركة وكتيرة في نفس ذات الوقت، وكنا دايما بنتبادل النظريات اللولبية اللي حيرت العلماء، زي مثلا ليه بيجيبوا للطلبة بيض في التغذية المدرسية وده سؤال مهم ؟؟!!!، وليه جبنة مثلثات، وليه أحيانا بسكويت ساده المفروض أنه بيتلك في الشاي!!
الجميل بقى أن التعليم عندنا غير أي حتة في مجرة درب التبانة، يعني تقدر تقول سوبر ماركت حاجه كده زي كارفور أو خير زمان، يعني على قد فلوسك هتدفع وتاخد تعليم، معاك فلوس كتير وبتصرف بقى وعايز تتعلم English من النضيف هتلاقي، عايز بقى تاخد قطتى صغيرة اسمها نميرة لعبها مسلي وهي لى كظلى، برضه طلبك موجود، المهم انك تحدد وتدور جوه جيبك وتشوف معاك تدفع لحد كام.
طبعا احنا شعب مبهر exactly، يعني بم تفسر أو علل أن العيل من دول في الثانوية العامة يجيب مجموع 405 من 410، المفروض اللي يجيب المجموع ده يروح على طول يشتغل في ناسا مش عايزة كلام، بس احنا عندنا اللي بيجيب 405 من 410 أصلا مبيطلعش من الأوائل.
وأنا في ألمانيا القمح بعمل الدكتوراة، اتعرفت على واحد من اللي هما بيحللوا دول اسمه جورج سانتيحا، كان دايما يقول لي إن العلم اللي في الرأس أهم من العلم اللي في الكراس، والطفل اللي بيقتصر تعليمه على المدرسة ما هو الا فردة جزمة قديمة متحركة، هو انتحر في الآخر لأنه لقي إن الواحد عندنا ممكن يتعلم 16 سنة وياخد له اتنين دكتوراة و4 ماجستير ويطلع مايلاقيش شغل، في الوقت أنه ممكن ياخد كورس 16 ساعة في قانون الجذب ويبقى مدرب تنمية بشرية وبيعمل فلوس ويدي محاضرات.