جبااااااااااااااااااااااااار في قسوته جبار، والسح الدح أمبو إدي الواد لأبوه ويا عيني الواد بيعيط.. وقف الخلق تيرارارا وقف الخلق تيرارارارار، وأنا جرالي إيييييييييييه جرالي إييييييييييييه، والقرع لما استوى قال للخي.... صوت الحاجة ماما في الخلفية: - إحنا قلبناها فقرة ما يطلبه المستمعون ؟! وبعدين قولت متغنيش في الحمام ومفيش دش يتأخد بالليل ومفيش غنا في الحمام بالليل، ومتاخديش حاجة تشغلي بيها أغاني في الحمام وبالليل. - أنا في سري وبتعيدي الجمل ليه تلاتة بغني في الحمام ورا بعض هاي ريكورد للحاجة، هادم الذات ومفرق الجماعات. - أنا: حاضر يا ماما وبعد شوية، يالي ظلمتو الحب أأأأأأأأأأأأأأأأأأاه وقولتوا وعدتوا عليه وأأأأأأأأأأأأأأأأاه قولتو عليه مش عارف إيه العي.... - نفس الصوت: يا بنتي حرام عليكي مش قولتلك مفيش غنا في الحمام بالليل أنتي عاوزه يجرالك حاجة متعرفيش إن الحمام ده بيت الجن والعفاريت أمال بنستعيذ ليه؟؟ - أنا: يعني هو العفريت مستني شاكيرا اللي هتغنيله في الحمام عشان يلبسها ماما: أنتي إيش فهمك في الكلام ده؟ - بيخرج العفريت للحاجة - العفريت: معاكي شمهورش متخصص لبس وأعمال سفلية وده الكارت بتاعي.. - الحاجة: عفريت عفريت فين أنت هتعملهم عليه أنت حرامى ياوله - العفريت: هو أنا لازم أطلعلك بدخان وقرون وحوافر عشان تصدقى إنى عفريت يعنى عليه الطلاق عفريت ووحياة أمك يا حاجة كفاية إشاعات سوئتوا سمعتنا كجن وعفاريت، وعاوز أقولك أني لو عاوز ألبس بنتك هلبسها بتغني في الحمام أو في الصالة أو نايمة في حضنك حتى والنضافة من الأيمان دش الصبح دش بالليل دش بعد الغدا قبل الفطار أرحمينا وأرحميها وسبيها تغني يا حاجة كفاية إشاعات. - بيختفي العفريت بتخبط ماما على الباب: شفتي أدي العفريت استغفر الله جه على السيرة عشان تعرفي إن كلامي صح ومفيش غنى في الحمام ولا في الصالة ومفيش نوم جنبي عاوزه العفاريت تلبسك.. - في عالم الجن العفريت شمهورش بيحط المسدس في بقه بيضرب الرصاص وبينتحر.
