كيف تكون وقحا بدون معلم ؟ (1)

1- اعمل نفسك بتفهم في كل حاجة.
2- خليك بتاع مصلحتك.
3- اتدخل في حياة كل الناس حتى اللي متعرفهومش.
4- خلي سعادتك انت بس هدف قدامك ومصلحتك فوق كل اعتبار، ومحروق كل الناس.
5- لو شفتي واحدة كبرت في السن وماتجوزتش أوعي تنسي تقوليلها: "وافقي بقي على أي حد وخلاص".
6- لو قاعد في قعدة مع أي حد، عيلتك، معارف، أو حتى على القهوة، ماتنساش تميل على حد فيهم تسأله "أنت بتقبض كام؟ ".
7- لو واحدة متجوزة من فترة ولسة مخلفتش ! عيب يفوتك تسأليها كل متشوفيها " مفيش حاجة في السكة؟".
8- وانت قاعد في المواصلات ولقيت راجل عجوز، أو واحدة حامل واقفين هيغمى عليهم من التعب، أعمل نفسك نايم.
9- لو شغلك في ستات إوعى تنسى تجيب اللي رايحة واللي جاية من أول رأسها لغاية رجليها وكأنك بتحاول تعرف مقاس هدومها عشان تجيبلها هدية، وبعدين تقوم تتوضى وتصلي الظهر.
10- ماتتصلش بحد ابدا تطمن علية، أتصل بس لما تكون عايز منه حاجة، دي ناس مقرفة متستهلش السؤال.
11- ما تنسيش أبدا تفضلي تشتكي للناس الظروف وقلة الفلوس والحياة طين مغلي، من باب أن العين فلقت الحجر.
12- أهم حاجة في الدنيا مصلحتك، وسعادتك وانبساطك وبرستيجك والنبي اوعى تنساه ده مهم قوي.
13- لما ولادك يتخانقوا مع ولاد الجيران أو زملائهم في المدرسة انصر ولادك حتى لو عايزين ضرب الجزمة.
14-لما تشوفي زميلتك لابسة حاجة جديدة لازم تعرفي جايباها منين وبكام وتجري تجيبي زيها حتى لو مش لايقة عليكي.
15 - أوعى تفتكر لأي حد حاجة كويسة عملها معاك، ده العادي والمفروض يعملها غصب عن عين أهله.
16 - لما تعزمي أهل جوزك على الغداء افضلي عايريه لغاية العزومة اللي بعدها.
17 - ما تنساش تعزم اهلك كلهم مرة واحدة وتبلغ مراتك قبلها بيوم واحد.
18 - لو مراتك بتعمل كل حاجة كويسة وفانية نفسها عشان البيت والأولاد وعشانك اوعي تشكرها لتتمرع عليك، بالعكس قولها "هو انتي بتعملي اية غريب يعني؟، دة واجب عليكي".
19- أول ماجوزك يرجع من برة وهو مش شايف قدامه من التعب، اشتكي له من العيال، ولطمي على وشك.
20- جوزك عندة مشاكل في الشغل واحتمال الشركة تصفي وتمشي الناس قولي لة أشمعني جوز شوشو صاحبتي جاب لها عربية جديدة وأنا لا، هي شوشو أحسن مني؟"، هييجي له نقطة ويريحك.