زيارة طبيب الأسنان

أرخم زيارة في التاريخ بتروحها غصب عنك وتحت ضغط مهول مش من حد حواليك، لا، من سنة أو ضرس مايجيش نص سم بس هتعمل ايه مضطر، وتروح العيادة تلاقى مريض يادوب سبق بخطوة يعطلك ساعة قعدها جوه عند الدكتور، وبعد ماتستحمل وتقبل الذل علشان الألم يروح وتقدر تنام، تدخل عند الدكتور لتكتمل مسيرة الذل يفتح بقك ولو مؤدب يقولك ياه الدنيا عندك خربانة، لكن لو واخد عليك يقولك إيه المستنقع اللى جوه بقك دا!
تاخد حقنة في اللثة توجع زى العيال، ويقعد يلعب في بقك وانت مش عارف تبلع بقك ومتضايق، وياريت زيارة وتنتهى لا دى بتتبعها زيارات أخرى لحد ماتخلص من المشكلة!
ديما لما اسنانى بتوجعنى أول كلمة بتطرأ على ذهنى.. هو دا وقته!.. دا طبعا طول الوقت.. لدرجة انى حاسة ان اسنانى هترد عليا تقولى.. ماهو لو انتظرنا ناخد ميعاد من حضرتك يبقى مش هنتصلح أبدا؟....علشان كده بالعب معاها الدنيئة وبعد أول زيارة للدكتور وتخفيف الاحساس بالألم باطنشها خالص لحد ما تبقى توجعنى تانى!