حاجات كتير ماتخلنيش أركب تاكسي

*أول حاجة: علشان اركب تاكسى لازم يكون معايا فلوس كتير، وعلشان يكون معايا فلوس كتير لازم اكون بشتغل وعلشان اكون بشتغل لازم يبقى عندى وسطة وعلشان يبقى عندى وسطة لازم يبقى أهلي ناس مهمين.. ولو أهلي ناس مهمين أكيد هيبقى عندى عربية واشتغل لية أساسا وبابا عنده فلوس كتير! وفى الحالة دى مش هحتاج لتاكسى!
*تانى حاجة: علشان اركب تاكسى لازم يبقى معايا رصيد في الموبايل علشان اتصل بالنجدة لو اتخطفت وعلشان يبقى عندى رصيد لازم يبقى معايا فلوس..وفرضا لو معايا فلوس ورصيد لية اقلق نفسى وافكر طول الطريق لو السواق خطفنى هضربه إزاى!
*تالت حاجة: لما هركب تاكسى هيجلى "فوبيا العداد" يعنى عينى هتفضل على العداد طول الطريق من أول ما بدأ البونديرة مرورا بكل ربع جنيه بيعده، وكل ما يقفل جنيه ادعى اكون وصلت علشان مايفتحش جنيه تانى!..لكن في الميكروباص أجرة موحدة وبريح نفسى!
*رابع حاجة: لو ركبت تاكسى هبقى لوحدى يعنى هفقد جو الألفة والصحبية اللى بتكون مع ناس ماتعرفهمش في الاتوبيس يعنى تلاقيع بيب صفى موبايلك وانت بتقرا الرسايل..ويبص في الجورنال ويقولك استنى ماتقلبش الصفحة اصلى لسة ما خلصتش الموضوع، وكمان هفقد وكالة رويتر المتنقلة اللى بتنقل لى كل الاخبار الصحيحة والمضروبة وبتسلينى طول الطريق، لأن مفيش اتنين بيركبوا ويفضلوا ساكتين ابدا
*خامس حاجة: اركب تاكسى لية واروح بيه فين ؟..وانا اصلا لاشغله ولا مشغلة!..اركبه يعنى على سبيل التفاخر؟!.. خلينى في البيت أحسن!