«إسكندرانية»: «التاكسي هيمشي بالعداد... ومش هنركبه من أول سبتمبر».. وسائق: بعضنا مفتري

سائق: الحكومة ظلمانا في البونديره والموضوع بقى عشوائي وبالحب مش بالقانون
ويعني أيه الكيلو بجنيه؟ ده مقابل "الصيانة والغرامات والبنزين والعامل"
"التاكسي هيمشي بالعداد وهنضرب ومش هنركبه من أول سبتمبر... كفاية استغلال ونصب"، دعوة أطلقتها مجموعة من فتيات الإسكندرية على "فيسبوك"، تحت هذا الشعار، أمس، تفاعل معها في اليوم الأول 115 ألف مستخدم.
هايدي شعبان أحد الداعين للإضراب، قالت: "مقاطعة وإضراب عن ركوب أي تاكسي ابتداء من يوم 1 سبتمبر؛ ضد استغلال وجشع أغلب سائقيه، لحين تطبيق نظام العداد".
وتوضح صديقتها شاهنده شعبان: الناس لازم تفهم أن الفكرة سببها ضرورة التغلب على النصب الذي يُمارس علينا كل يوم من قبل سائقي التاكسي، ومش معني إني بركب تاكسي يبقي مرفهة والفروض يتنصب عليا وادفع عادي، تحت مبرر متجيش على السواق الغلبان اللي أجرته محصلتش فنجان قهوة في أحد الكافيهات الشهيرة.
ويوافقهم الرأي محمد علي، قائلا: المفروض يتم تطبيق تعريفة التاكسي زى القاهرة، واعتقد أنها عادلة، مفصلا: التعريفة تعني "فتح العداد 3 جنيه ثم كل كيلومتر 140 قرش وبيتم حسابها كل ما يمشى 200 متر مقابل 14 قرش، ودقيقة الانتظار 25 قرشا أي طول ما هو واقف في إشارة أو زحمة يعد 25 قرش على كل دقيقة.
وأردف "علي" ولو في سائق تاكسي معترض يبقى حرامي؛ لأن القاهرة شغالة به وبنفس أسعار البنزين والمخالفات والصيانة إنما اللي بيحصل في إسكندرية ده بلطجة من أغلب سائقي التاكسي؛ فى مشاوير كتير بشوف مسافاتها على الخريطة وأطبق عليها تعريفة القاهرة ألاقى المفروض ادفع اقل بكتير من اللي السواق طالبه.
ويرد عليهم ياسر التوني متهكمًا: انتو أصلا تعرفوا أيه عن التاكسي وسائقه بتقعدوا علي الكافية بتاع الشيشة "يظبطكم" والجرسون "يروشكم" والمتر "يعطيكم القفا الصح" ويقلكم الحساب 130جنية، ومن زوقك تعطيه 150 عشان مظهرك بلاش خيبه؛ عارفين العداد يعمل كام من الموقف الجديد لمطار برج العرب ذهاب وعودة 102 جنية والوقت ساعة ونصف... يا سلام على العدل، طب عارفين من المعمورة للمنشية كام بالعداد 17.75 ومن العصافره لمحطة سيدي جابر 8.50، ومن ميامي لسان ستيفانو 4.10، على حد وصفه.
مروة رجب تقول: أنا حصلي حاجة مختلفة شويه... ركبت تاكسي من داون تاون لكليوباترا والسكة كانت فاضيه جدا وصلنا بسرعة أعطيت التاكسي 10 جنيه، وجيت امشي ندانى ولقيتة بيدينى 2 جنيه وشاورلى على العداد وبيقولى الأجرة 7 جنيه ونص بس... أنا بصيتله وكنت عاوزه أقوله: "أنت المفروض يتعملك تمثال".
محمود حمودة: خرجت من الخدمة العسكرية 76بعد الحرب ومعي رخصه قياده مهنيه وعملت 4 سنوات بها، وكان الانضباط المروري لمده شهر كل عام يطبق فيه لأجل احترام قانون المرور ومن بينها: العداد فكان عدم تشغيله يعني سحب رخصة القيادة شهر وغرامه 10 جنيهات وكانت تساوى يوم عمل كامل، فكان هناك من يطبق القانون والغالبية تحترمه.
ويعقب عبد الرحمن يحي قائلا: أنا سواق تاكسي والايفنت ضايقني جدًا؛ واستفدت حاجات من قراءة بعض الكومنتات، وحسيت أن الايفنت اكتر ناس ممكن يستفيدوا منه السواقين لكن السؤال يعني أيه الكيلو بجنيه؟ ده داخل فيه "صيانة العربية، والغرامات، والبنزين اللي غلى اكتر من الضعف خلال سنه وطلع ناس ساعتها يقولوا برضوا أن السوقين حراميه... أنا معاكم في سواقين مفترين بس ده بسبب إن الحكومة ظلماهم في البونديره فأصبح الموضوع عشوائيا، وبالحب مش بالقانون لان القانون ظالم جدا، على حد وصفه.