بالعند في الرجال.. كيف تصبحين مليونيرة

حاولت العديد من الدراسات الكشف عن طبيعة عقل المرأة، نظرا لما تتميز به من قدرة مزدوجة على التفكير على عكس الرجل، فطبيعة عقلها الشبكي يساعدها على ممارسة أكثر من نشاط في الوقت نفسه، تستطيع الاكل والكلام والعمل – وضرب العيال- في نفس اللحظة، كما أن خلايا مخها تعمل أثناء النوم، ورغم ذلك اهتم العديد من الاقتصادين بتأليف كتب للرجال "كيف تصبح مليونير" ولم يفكر أحدهم في تأليف كتاب "كيف تصبحين مليونيرة"، لذا عزيزتى المرأة سنقدم لك العديد من النصائح التي تصنع منك مليونيرة –ولا الحوجة للرجال –
* افتحى شركة توظيف أموال وسميها "الريانة"، واما تلمى كام مليون اهربى وروحى عيشى في لندن
*ممكن تشتغلى سواقة تاكسى واكيد هيجيلك ركاب كتير، وفى الغالب اللى هيركب مش هيحس بالوقت العبى في البونديرة وخلى العداد يعد واهو كله داخل جيبك، وما تنسيش تكتبى على التاكسى" ماتبصليش بعين رضية بص للى اندفع فيا"
* اتجوزى واحد غنى وحوشى من وراه والقرش الأبيض ينفع في اليوم الأسود، ولو ماعرفتيش تحوشى، اتطلقى وخدى مؤخرك اللى هيكون طبعا كبير، وأبدئى أول مشروعات حياتك
* اتجوزى راجل عجوز محوش قرشين، ماتقلقيش موش هيطول هيبقى هو المرحوم وانت هتورثى كل حاجة
* اسرحى بعربية كبدة وسجق، أهم حاجة تكون من المنتجات منتهية الصلاحية علشان تقدرى توفرى من وراها وبيعى السجق ب 75 قرش والكبدة ب50
* افتحى كوافير، مفيش ست بتقدر تستغنى عن الكوافيير والمكياج، وبيعى كمان حبة منتجات عناية بالبشرة استيراد الصين
* حطى ايدك على ارض ملك الدولة وهاتى عليها قرض وابنى عليها برج، وبيعى الشقق واهربى على برة، أو خوديها من قاصرها واهربى بالقرض على طول
* خدى لك شيفت شحاته مسائى، بس أهم حاجة تهتمى أن يكون منظرك شيك، علشان اللى يشحتك يتكسف من نفسه لو اداكى فلوس قليلة وماتقبليش أقل من 20 جنيه