لو ناوي تدخل طب يبقى الله يرحمك ؟!

للأخوة طلبة الثانوية العامة اللي ناويين يدخلوا طب .." أنا هاقولك كلام محدش قالهولنا والمفروض انه يتقال .. بص يا حبيبي وركز معايا " :
1- الطب (7 سنوات دراسة لأن خامسة وساته سنتين مش سنة وسنة امتياز) اللي هي أصلا شهادة ملهاش لازمة وهتحتاج معادلة لو هتسافر برة وهتحتاج زمالة لو هتشتغل في مصر.
2- كلية طب هي عبارة عن ثانوية عامة بس بدل سنة هيبقوا ست سنين .. الضغط العصبي اللي انت شفته في الثانوية هتشوف زيه في السنين الباقية من دراستك وضعفه في سنة تالتة وتلات أضعافه في ليلة امتحان الباطنة وامتحان النسا.
3- انسى موضوع انك من الأوائل والكلام دا 80 ٪ من طلبة الكلية بيشيلوا مادة في سنة ما.
4- الدراسة في كليتنا بسيطة (الصبح في الكلية - العصر في الدروس - وهتاخد دروس لو عايز تعدي - وبليل يا بتذاكر يا بتطلع اكتئابك على الفيس .
5- متعتقدش انك هتتخرج مجدي يعقوب .. هتتخرج حمار وهتبدأ تتعلم طب بعد ما تتخرج.
6 - الدكاترة بيدخلوا الجيش 3 سنين.
7 - عارف الحياة الجامعية اللي هي البنات مع الصبيان وصحاب وخروجات وكدا .. دي في الكليات التانية مش في طب .. فاعمل حسابك ان 90 ٪ هتبقى ناشفه.
8 - انسى جو House, Greys anatomy, scrubs ايا كان اللي شفته دا مش عندنا .. احنا مستشفياتنا اقرب ما تكون للحمامات العمومية.
9 - عايز برستيج ومركز .. قدم على حربية او شرطة .. الدكاترة بيضربوا ويتشتموا في الطوارئ والمستشفيات عادي جدا .. سيبك من جو البرستيج دا خالص وانت داخل الكلية .. انت هتاخد فوق دماغك من الدكاترة طول الستة سنين وبعد كدا من العيانين لحد ما تبقى اخصائي على الأقل.
11- ابوك هيصرف عليك لحد ال تلاتين على الأقل .. مرتب الامتياز 250 جنيه تقريبا .. والتكليف 1200 .. يا ريت تفهم ابوك النقطة دي عشان ميجيش يزمزق في نص الطريق.
12-%48 من خريجي طب بيشتغلوا في حاجة غير الطب بعد ما يخلصوا.
13- %62 من خريجات طب بيعنسوا.
باختصار اللي أوله شرط اخره نور .. عايز فلوس/ برستيج/ حياة حلوة وسعيدة .. يبقى الكلية دي مش هتوصلك للي انت عايزه .. غير كدا أهلا بك في حديقة الحيوان.