مصر مش تكية

يا جدعان مصر مش تكية مصر بتنام وبتقوم مشتكية
كانوا فاكرينها ملك ليهم وقسموها زى تورتة فى صينية
وباعوا أراضيها ببلاش وصدروا الغاز للحكومة الإسرائيلية
30 سنة فى الحكم وكانوا هيورثوها لعيالهم وأحفادهم الجاية
وشبابك عمل ثورة وشال الفساد من جذوره المروية
وقلنا بعد الثورة مصر هيكون فيها عدالة وحرية اجتماعية
لكن لا شفنا عدالة ولا حرية ولا حتى ديمقراطية
وعاشت مصر فترة عمرى ما انسى الأيام دية
شافت بهدلة وذل وإهانة وإضرابات عمال وصنايعية
وقطع طرق وسرقة وإجرام ومولوتوف وقنابل وبلطجية
حاولوا يقتحموا ماسبيرو وهجموا على وزارة المالية
وقفوا المراكب السايرة وكمان وقفوا العجلة الإنتاجية
هبوط حاد فى البورصة وهبوط أشد فى الدورة الدموية
نزيف وناس بتموت وتهموها فى البورسعيدية
ومبارك خد مؤبد وعلاء وجمال براءة م القضية
طب فين حق الشهيد وإيه آخرة البطولة الوطنية
طب هو مات عشانا واحنا عشانه نسينا الثورة المصرية
حرمونا من البنزين عشان يحرقوا مجمع الكتب العلمية
وطوابير عيش وطوابير أنابيب وطوابير اللجنة الانتخابية
عملوا أحزاب واتقسموا علمانية وإخوانية وسلفية
وقالوا إن العسكر باعكو أنا قلت متوصلش للدرجة دية
دا العسكر دول جنودك حموكى بسواعدهم الأبية
وقالوا على الأمن بتاعنا انهار بسبب الشرطة والداخلية
وانا قلت نسيتوا الظابط اللى بيشتغل من الليل للصبحية
عشان يحمينا ويمسك الفاسدين والمجرمين والحرامية
ونسيتوا أمين الشرطة اللى مات برصاص الغدر من البلطجية
يا مصر قوليلى مين بيحبك ومين راسم على وشه ضحكة غبية
حالف ليخرب فيكى وكأنك مش أمه مرات أبوه المفترية
بس هانت يا مصر بكره هتقضى على التخلف والهمجية
وهتعلى بسواعد رجالك وأبنائك المخلصة الوفية
وهتفضلى أم الدنيا وهتبقى من أقوى الدول الاقتصادية
واستقرارك هيرجع يستقر وهتهدى الأوضاع الداخلية
واهو جالك رئيس جديد مبروك عليك المهمة القومية
الله يعينك على البلد ويجعل الخير فى الأيام الجاية
بس خد بالك مصر مش تكية كلها 4 سنين وترجع لدرجتك الوظيفية
متعملش زى ناس تانيين لزقوا فى الكرسى وباعوا القضية
لو كنت رئيس كويس هنديك صوتنا المرحلة الجاية
لو كنت غير كدا هنعمل ثورة ومتخافش هتبقى سلمية
لكن احنا متفائلين خير وهنستنى نشوف برامجك القوية
عاوزين نهضة لبلدنا ونسبق كل البلاد العربية والأجنبية